Presidenti turk Tajip Erdogan ra dakord të enjten në Zagreb me pretendimet e presidentit rus Vladimir Putin se gruri nga Ukraina u dërgohet vendeve të pasura në vend të atyre të varfra.
Të mërkurën, Putin tha se drithërat e eksportuara në bazë të marrëveshjes së nënshkruar me ndërmjetësimin e Turqisë dhe OKB-së nuk arrijnë në vendet më të varfra, që është qëllimi i vërtetë i marrëveshjes.
“Putini ka të drejtë, gruri shkon në vendet e pasura, jo të varfra dhe qëllimi ynë ishte të siguronim dërgimin e grurit tek të varfërit,” tha Erdogan në një konferencë shtypi gjatë vizitës së tij në Zagreb.
“Rusia, ndërkohë që sanksionet kundër saj vazhdojnë, nuk dëshiron që gruri t’u dërgohet vendeve që e sanksionojnë. Kjo e shqetëson Putinin”, shtoi ai.
Në mënyrë që sasitë e mjaftueshme të arrijnë në vendet e varfra, presidenti turk beson se dërgesat e grurit nga Rusia duhet të fillojnë sa më shpejt të jetë e mundur.
Putin paralajmëroi për një krizë globale ushqimore
Ai njoftoi se këtë do ta diskutonte me Putinin në një samit rajonal në Uzbekistan në fund të shtatorit.
Në një forum ekonomik në Vladivostok, Putin tha të mërkurën se Rusia dhe vendet në zhvillim ishin “mashtruar” në një marrëveshje për eksportin e grurit ukrainas dhe u zotua të rregullojë kushtet e marrëveshjes për të kufizuar numrin e vendeve që mund të marrin dërgesat.
Në komentin më të ashpër deri më tani për Marrëveshjen për eksportin e drithit nga Ukraina, Putin paralajmëroi një krizë globale ushqimore nëse çështja nuk zgjidhet dhe njoftoi se do të kontaktojë Erdoganin për të rënë dakord se si të rregullohet marrëveshja dhe të kufizohet numri i vendet që mund të marrin grurin.
Shifrat e OKB-së tregojnë se shumica e anijeve mbërritën në Turqi me dërgesa drithi të destinuara për në Kinë, Indi, Egjipt, Jemen, Somali dhe Xhibuti.
Marrëveshja për eksportin e drithit nga portet e Detit të Zi, e nënshkruar në korrik për të shmangur një krizë ushqimore, garanton kalimin e sigurt për anijet drejt dhe nga Ukraina, me inspektimin ndërkombëtar për të lejuar eksportin e dhjetëra milionë tonëve drithë dhe për të lehtësuar krizës ushqimore në botë. /tesheshi.com/
