Edi Rama nis erën “post-Kokëdhima” në Partinë Socialiste dhe nuk ka vonuar të bëjë rrokadën duke zëvendësuar ish-deputetin e qarkut Vlorë me “armikun” e tij-sot zv.ministër i Brendshëm, ish-kryebashkiakun e Sarandës, Stefan Çipa.
Siç mësohet, kryesia e PS-së ka përgatitur kalimin e Sekretariatit për Emigracionin që mbahet aktualisht nga Koço Kokëdhima, në duart e Stefan Çipës, i cili edhe në Ministrinë e Brendshme është marrë që nga marsi me regjistrimin e emigrantëve, e cila do të jetë edhe karta e re e Edi Ramës në zgjedhjet e 2017-s.
Siç duket, marrëdhënia mes dy miqve të dikurshëm tashmë nuk është politikisht e afërt dhe, kryetari i PS-së ka nisur lëvizjet që në një farë mënyrë janë një “mea culpa” për largimet që ka bërë me fjalën e ish-mikut të tij, Koço Kokëdhima kryesisht në jugun e vendit.
Në mbledhjen e djeshme të sekretariatit dhe kryesisë të PS-së, Koço Kokëdhima ka munguar për të pestën herë duke kaluar kështu kufirin e parashikuar statutor që e largon automatikisht nga funksioni.
Nga administrata e selisë rozë, Kokëdhimës i është dhënë një zyrën në katin e tretë që ndodhet sipër asaj të kryetarit Edi Rama, por e cila qëndron e mbyllur që prej zgjedhjes së ish-deputetit në funksionin e Sekretarit për Emigracionin dhe Reformën Strukturore.
Në derë është vënë mbishkrimi “Koço Kokëdhima” dhe zyra qëndron në fund të korridorit.
Ndërkohë, në ballë të shkallëve ndodhen zyrat e sekretarëve për Dxhitalizimin, Alfred Pezës dhe e Sekretarit për Koalicionin, Musa Ulqinin. Në fillim djathtas është zyra e Erisa Spiropalit, që është Sekretare për Rininë.
Kokëdhima nuk e ka hapur asnjë ditë zyrën e tij pasi priste vendimin e Kushtetueses, dhe pas tij marrëdhëniet e tij në PS u bënë të ngrira.
Zëvendësimi i Kokëdhimës me Stefan Çipën përbën një shenjë force të Edi Ramës karshi ish-mikut të tij, por edhe një lëvizje që i jep sinjal “socialistëve të vjetër” që e shikonin veten të margjinalizuar nga “rilindasit”.
Partia Socialiste prej fillimit të shtatorit është përfshirë në përgatitjen e të gjitha strukturave të saj për zgjedhjet e ardhshme politike.
Me emigrantët Rama ka një plan që pret ta zbatojë në të gjithë vendin, atë që bëri në 2013-ën me Tiranën dhe Gjirokastrën.
Që do të thotë sjelljen e një numri të madh emigrantësh kryesisht nga Greqia dhe Italia në mënyrë që të rritet numri i votuese. Mësohet se një gjë e tillë ka ndodhur edhe në Dibër por që u zhillua në mënyrë të fshehtë pa bërë bujë. /tesheshi.com/
