Nga Etjola Bedo
Mban emrin e të madhit Eqerem Çabej, i përket një ndër qyteteve “djep kulture e qytetërimi”, por është katandisur si mos më keq. Bëhet fjalë për universitetin e Gjirokastrës, që këtë vit ka shënuar një rekord negativ: nga 1150 kuota për studentët, vetëm 350 syresh janë regjistruar, duke rrezikuar kështu dhe mblljen e 5 degëve.
Pak histori
Me vendim të Këshillit të Ministrave, me datën 12 nëntor të vitit 1991 u çel për herë të parë në jug të vendit universiteti që do të mbante emrin e gjuhëtarit të madh gjirokastrit, Eqrem Cabej. Shumë shpejt, ky universitet u bë ndër më të preferuarit, sidomos për të rinjtë nga jugu, ku shumë prej tyre u diplomuan në degë të ndryshme duke shërbyer me pas në shumë sektorë.
Vit pas viti, universiteti fitoi standarte të larta mësimëdhënieje, jo vetëm për shkak të kushteve e infrastukturës studimore ne kabinete, laboratorë, bibliotekë shkencore etj., por dhe për arsye të stafit elitë të pedagogëve. Deri para viteve 2000 në këtë universitet pranimet bëheshin me anë të konkurseve reale, ku fitohej degë vetëm në bazë të meritës, gjë që sot duket diçka e largët. Dhe janë ca tregues që e vërtetojnë degradimin e këtij universiteti.
E sot
Tashmë, aty sheh një brez studentësh krejt indiferent ndaj arsyes pse janë aty. Nëse i pyet se ku ndodhet biblioteka apo salla e studimit, ngrejnë supet pasi as që ia kanë idenë. Madje dhe pyetja që iu bëhet u duket shumë e pavend. Për ta, prania në universitet, në auditore pra, është një fraksion i ndërmjetëm kohor mes kafeve. Mjaft të vëresh se rrallë has studentë me dispensa në duar. Në bibliotekë do gjesh maksimumi deri në dy a tre studentë. Salla e studimit i ka të gjitha, edhe kompiuterat e internetin, por ajo është bosh.
Drama vjen më pas, kur sheh se po braktisen pothuajse fare fakultete si ai i Edukimit dhe Shkencave Shoqërore e i Shkencave të Natyrës. Regjistrimet këtë vit kanë shënuar një rënie drastike, ku nga 1150 kuota të parashikuara nga MAS, janë regjistruar për herë të parë vetëm 350 studentë, ndërkohë që rrezikohet mbyllja e 5 degëve siç është ajo e Historisë greke, Historisë italiane, Gjuhës italiane, Matematikë-Fizikës dhe Turizmit. Në këto degë janë regjistuar gjithsej 10 studentë.
Zv. Rektori, Jani Dine pohon se ende nuk ka një përgjigjie zyrtare nga ana e Ministrise se Arsimit se çdo të bëhet me ta dhe degët në fjalë. Çdo vit numri i regjistrimeve në këto 5 degë ka ardhur duke u ulur ky duket se do të jetë fundi i historise se tyre, e bashkë me to edhe shkëlqimi i dikurshëm i Universitetit “Eqrem Cabej” fati i të cilit varet nga brezi i ri – a më saktë kohës së re me gjithë çka brenda: brez njerzish, kontekst tjetër ekonomik, social e kulturor – që duket se po e çon atë drejt rrënimit.
Megjithatë, rektorit aktual, Bektash Mema nuk pranon të dorëzohet. Ai kërkon me ngulm që ta ruajë shkëlqimin e dikurshëm, duke tentuar së paku binjakëzime e bashkëpunime me universitete simotra në rajon a më tej, si dhe njohjen e diplomave të ketij universiteti edhe jashtë Shqiperisë, akte që po shkojnë drejt finalizimin. Për ta mbajtur gjithsesi moralin lart, ai u ka thënë atyre pak studentëve se “të gjithë së bashku mund t’ia dalim për t’i rikthyer vlerat e dikurshme universitetit”, por kundër ka kohën, së bashku me njerëzit, cilësia e të cilëve nën emrin e vizioneve dhe idealeve ka rënë frikshëm. /tesheshi.com/
