Mes tërë institucioneve që kanë mirëpritur fitoren e Emmanuel Macron-it në balotazhin e së dielës në zgjedhjet presidenciale franceze nuk ka munguar dhe objekti kryesor i kultit i muslimanëve në Paris.
Xhamia e Madhe e Parisit, La Grande Mosquée de Paris, ka shprehur përmes drejtuesve të saj gëzimin për këtë fitore, e vendosur hapur në krah të kandidatit centrist.
Në një deklaratë të kësaj xhamie thuhet për fitoren e Macron-it: “Është një shenjë e qartë shprese për muslimanët francezë se mund të jetojnë në harmoni dhe në respekt të vlerave humaniste, patriotike, demokratike dhe shekullare republikane.”
Për këtë institucion të muslimanëve në kryeqytetin francez, rezultati i votimeve të djeshme dhe zgjedhja e Macron-it si president është shenjë e një France të pajtuar me të gjithë komponentët e saj shpirtërorë dhe fetarë për t’iu përgjigjur me unitet kërcënimeve të përçarjes që rëndojnë mbi vendin.
Një nga krerët e Xhamisë së Madhe të Parisit, Dalil Boubakeur, do t’u bënte thirrje pas votimeve të 23 prillit, të raundit të parë, rreth pesë milionë muslimanëve në vend që të votonin masivisht për zgjedhjen e Macron-it, duke zgjedhur kështu atë “që mbron vëllazërinë midis qytetarëve, e jo urrejtjen”.
Emmanuel Macron do të tërhiqte vëmendjen muaj më parë me një deklaratë të guximshme për të shkuarën koloniale të Francës në Algjeri, duke e cilësuar atë një krim kundër njerëzimit.
“Është vërtet barbare,” do të pohonte më herët Macron, “është pjesë e asaj të shkuare me të cilën duhet të përballemi duke u kërkuar ndjesë të dëmtuarve.” /tesheshi.com/
