Në kohën e një krize energjitike me theks global, e cila paralajmërohet të jetë më e thellë në dimrin e pas disa muajve, ministrja Balluku përcjell optimizëm sa i përket burimeve alternative.
Gjatë fjalës së mbajtur në Konferencën e parë Kombëtare Antikorrupsion, ajo bëri me dije se janë 9 kompani ndërkombëtare të cilat kanë shprehur interes për ndërtimin e parqeve eolike, me një kapacitet prej 100 megavatësh.
“Një eksperiencë e re, shumë e suksesshme po vazhdon dhe po ndodh në këto momente me tenderin e ndërtimit të impianteve të erës. Një ankand i dytë, pasi atij të impianteve fotovoltaike, impiantet e erës.
Në datën 9 qershor, skuadra ime e Ministrisë së Infrastrukturës dhe Energjisë, me prezencën e skuadrës së BERZH, kanë hapur fazën e parë të shprehjes së interesit përsa i përket këtij ankandi për ndërtimin e parqeve 100 megavat në Republikën e Shqipërisë.
Deri më tani janë 9 pjesëmarrës, të cilët janë nga kompanitë më të mëdha europiane. Nga Verbundi austriak, tek Total francez, të cilët kanë shprehur interes për të marrë pjesë në fazën e dytë dhe për të pasur pas një viti një fitues edhe në këtë fushë”, informoi gruaja që i ka rënë të menaxhojë një ndër situatat më të rënda ndër vite në sektorin e energjisë, ardhur nga efekte globale.
“Nëse punohet ashtu siç duhet, padyshim Shqipëria mund të bëhet një vend udhëheqës përsa i përket të gjithë iniciativave ekonomike të rajonit, por nga ana tjetër mund të bëhet një vend europian në të gjitha nivelet dhe strukturat administrative”, deklaroi ajo që po shfaqet vitet e fundit si ndër figurat femërore më imponuese të mazhorancës, në planin teknokratik dhe atë politik. /tesheshi.com/
.
