Në samitin e Brukselit, liderët e BE kërkuan diversifikim të mëtejshëm të burimeve të energjisë dhe rrugëve të furnizimit në Evropë dhe për sigurimin e furnizimeve me energji me çmime të përballueshme. Njëhersh, 27 vendet përsëritën thirrjen që Ballkani Perëndimor t’i bashkohet platformës së blerjes së energjisë së BE-së.
Udhëheqësit e BE-së i kanë bërë thirrje Komisionit Evropian që të eksplorojë me partnerët ndërkombëtarë mënyrat për të frenuar rritjen e çmimeve të energjisë, duke përfshirë mundësitë për të kufizuar përkohësisht çmimet e importit të energjisë.
Konkluzionet e Këshillit Evropian për Energjinë insistojnë në strategjinë e BE-së për angazhim të jashtëm energjetik, rëndësinë e burimeve të brendshme të energjisë për sigurinë e furnizimit dhe përshpejtimin e zbatimit të zgjedhjeve të energjisë së rinovueshme.
Në këtë kuptim, kërkohet përshpejtimi i procedurave për dhënien e lejeve për projektet e energjisë së rinovueshme, përmirësimi i efiçencës energjetike, konkretisht kursimit të energjisë, si dhe kompletimi i infrastrukturës së rrjetit evropian për gazin e lëngshëm dhe energjinë elektrike.
“Në frymën e solidaritetit evropian, gatishmëria për ndërprerje të mundshme të mëdha të furnizimit dhe elasticiteti i tregut të gazit të BE-së duhet të përmirësohet, veçanërisht përmes negociatave të shpejta të marrëveshjeve dypalëshe të solidaritetit dhe një plani të koordinuar evropian të emergjencës”, tha Këshilli Evropian.
Komisioni Evropian ka për detyrë të vazhdojë punën për optimizimin e funksionimit të tregut evropian të energjisë elektrike, duke përfshirë efektin e çmimeve të gazit në të, në mënyrë që ai të jetë më i përgatitur për të ruajtur sigurinë e furnizimit dhe çmimet. /tesheshi.com/
