Kryeministri Zoran Zaev në konferencën e sotme për media pranoi se Maqedonia si asnjëherë më parë nuk ka qenë aq afër për ta zgjidhur çështjen e emrit me fqinjët grekë. Me këtë, sipas tij, Maqedonia është duke ecur drejt Bashkimit Evropian dhe NATO-s, janë duke u zgjidhur mosmarrëveshjet, por edhe është duke u përforcuar identiteti maqedonas.
“Asnjëherë nuk kemi qenë kaq afër zgjidhjes, asnjëherë nuk kemi qenë kaq afër me miqtë. Është konfirmuar edhe identiteti i maqedonasve. Maqedonisë nuk i duhen vetëm fjalë boshe, por i duhet udhëheqje dhe hap përpara. Patriotë të vërtetë janë ato që e çojnë vendin përpara. Me zgjidhjen e kontestit do të hyjmë në NATO. Rajoni nuk guxon të lejojë hapa pas. Maqedonia është në rrugën e duhur, reformat kryesore janë njohur nga të gjitha vendet e BE-së. I treguam botës se kriza politike është pas neve”, tha Zaev.
Ai nuk deshi të përgjigjet se cili është emri për të cilin po bisedojnë dhe tha se ende për asgjë nuk janë marrë vesh. Mirëpo sipas tij nëse paraqitet nevoja për referendum, sigurisht që do të respektohet vullneti i popullit.
“Pason biseda me Cipras. Nëse ka diçka, do ta ndaj me qytetarët, e dini se jemi transparentë. Fillimisht do të votohet emri me shumicë parlamentare në Kuvend, e pastaj shkojmë me referendum”, u përgjigj shkurt Zaev. /tesheshi.com/
