Disa organizata maqedonase po i mëshojnë fort idesë se çështja e “emrit”, është një krim që po bëhet ndaj popullit maqedonas.
Janë përfaqësuesit e Lëvizjes Ndërkombëtare Maqedonase për të drejtat e njeriut, Diasporës së Bashkuar Maqedonase, Kongresit Botëror Maqedonas dhe Rrjetit Koordinues Maqedonas, ata të cilët në një deklaratë të përbashkët shprehen se “populli maqedonas nuk mund të durojë padrejtësitë e padurueshëm që po i vijnë nga Greqia, Kombet e Bashkuara, Bashkimit Evropian dhe NATO”.
Sipas tyre, në këmbim të anëtarësimit në BE dhe NATO, është hera e parë që po ndodh diçka e tillë më nje komb, të cilin e konsiderojnë një krim.
“Për të ndaluar këtë gjenocid kulturor, maqedonasit kërkojnë mbështetje nga të gjithë popujt në botë për të ndaluar këtë krim”, thuhet në deklaratën e tyre.
Ndër të tjera, ata i kërkojnë Greqisë që “të pranojë zyrtarisht dhe të kërkojë falje për gjenocidin, krimet e luftës dhe krimet kundër njerëzimit, ndaj pakicës maqedonase në Greqi që nga viti 1913 e deri më tani”.
Ky zhvillim vjen në një kohë kur Athina dhe Shkupi kanë intensifikuar bisedimet për t’i dhënë fund çështjes së “emrit”. /tesheshi.com/
