Gjatë qëndrimit disaditor në Shkup, zëvendësndihmës sekretari shtetëror i SHBA-së, Brajan Hojt Ji ka mbajtur një konferencë për media me ç’rast ka dhënë një mesazh pa “doreza diplomatike” për partitë në pushtet. Ai, pas takimit me partitë nënshkruese të Marrëveshjes së Përzhinos ka thënë se SHBA-të dhe komuniteti ndërkombëtar fuqishëm mbështesin Marrëveshjen e Përzhinos; dhe pa marrë parasysh se kush është në qeveri, ata kërkojnë veprime dhe jo vetëm fjalë e premtime të kota. Sipas tij, tërheqja e pjesërishme e vendimit për abolim të presidentit Gjorgji Ivanov, ashtu siç pretendojnë partitë në pushtet, nuk do t’i shërben të mirës së shtetit, por vetëm do rrisë ndjenjën e pandëshkueshmërisë dhe mungesën e përgjegjësisë në shtet.
“Në sigurisht, kemi folur në të gjitha takimet e djeshme dhe të sotme për abolimet e presidentit. Këto abolime i dëmtojnë rregullat e drejtësisë në Maqedoni, por edhe kredibilitetin e Maqedonisë si shtet, që është e determinuar që të futet me Evropën në rrugën euroatlantike. Është shumë e rëndësishme që liderët të veprojnë në mënyrë urgjente të përmirësojnë dëmin e këtyrë abolimeve. Përmirësimi i dëmeve duhet të bëhet në mënyrë të qartë, gjithëpërfshirës dhe sa më shpejtë që është e mundur. Nëse liderët tërheqin ose shfuqizojnë abolimet në mënyrë të pjesërishme apo selektive, kjo vetëm se do ta shtojë ndjenjën e pandëshkueshmërisë në shtet dhe mungesën e përgjegjësisë”, ka porositur Hojt Ji.
Ai më tej theksoi se Amerika kërkon nga qeveria të zbatojë reformat që kërkohen me Marrëveshjen e Përzhinos duke lënë institucionet e drejtësisë të kryejnë punën e tyre.
“Qeveria, përmes veprave duhet ta dëshmojë përkushtimin e saj për të pasur një demokraci të fuqishme dhe pluralizëm, gjithashtu për të zbatuar reformat që u përcaktuan me Marrëveshjen e Përzhinos duke nënkuptuar kyçjen e opozitës dhe sektorit civil në procesin e reformimit të vendit. U bëjmë thirrje liderëve të Maqedonisë të zbatojnë reformat e Përzhinos, t’i forcojnë institucionet për të ndërtuar një qeveri inkluzive dhe me përgjegjësi. Nëse liderët veprojnë kështu, SHBA do të vazhdojë përkrahjen e saj të fuqishme për këtë vend. Institucionet e fuqishme dhe të pavarura janë nevojë urgjente e Maqedonisë, ata duhet të jenë të lira për ta kryer punën e vet, pa ndërhyrje partiake dhe të kenë resurset e duhura, posaçërisht ata që zbatojnë drejtësinë. Amerika mbështet demokracinë dhe vendet ku ka sundim të ligjit”, shtoi më tutje Hojt Ji. M.Krasniqi – tesheshi.com
