Emel el-Kubejsi është zgjedhur të mërkurën kryetare e parlamentit të Emirateve të Bashkuara Arabe, duke sjellë një risi në tërë botën arabe, si e para dhe e vetmja femër në këtë post.
“Jam e nderuar të jem e para femër e zgjedhur si drejtuese e Këshillit Kombëtar Federal. Ky është një testament për mbështetjen e vendit për popullin e tij për të arritur fuqizimin politik,” tha Kubejsi pas zgjedhjes.
Kryetarja e re e parlamentit të EBA-së është në mandatin e tretë në Këshillin Kombëtar Federal. Ajo është arkitekte në profesion, dhe e ka nisur karrierën parlamentare në vitin 2006, kur u bë e para femër që u zgjodh për në parlament. Ndërsa në vitin 2013 do të bëhej e para femër zëvendëskryetare e parlamentit, e po ashtu e para femër që do të drejtonte një prej seancave të tij në të njëjtin vit.
Këshilli Kombëtar Federal, ndryshe parlamenti i Emirateve të Bashkuara Arabe, përbëhet nga 40 anëtarë, gjysma e të cilëve zgjidhen drejtpërdrejt nga populli, e gjysma tjetër emërohet nga qeverisësit e vendit. /tesheshi.com/
