Nga Blendi Gashi
Kryeministri Ramush Haradinaj, i kritikuar tej mase për numrin e madh të zv.ministrave, aktualisht ka ndalur emërimin e tyre; por ai ka shpikur një pozitë tjetër për të emëruar militantë të partive, atë të koordinatorëve që të emëruarit do marrin pagën e njëjtë sa të zv.ministrave.
Haradinaj ka emëruar të martën Mendim Rugovën, djalin e ish-presidentit Ibrahim Rugova – koordinator për Ndryshime Klimatike dhe Çështje të Ambientit, ndërkaq, nënkryetarin e PDK-së, Rexhep Hoti e ka emëruar koordinator nacional për Kulturë, Rini dhe Sport, kurse javë më parë bashkëpartiakun Besnik Tahiri koordinator nacional për Reforma Shtetërore.
Ndaj këtyre emërimeve ka reaguar shoqëria civile duke i quajtur të turpshme dhe zhvatje të buxhetit.
Artan Murati nga Instituti Demokratik i Kosovës (KDI) thotë se qytetarët po paguajnë paga për militantë të partive dhe akuzon kryeministrin se po shpik pozitë të re për të rritur kabinetin e tij.
“Çka është roli i këtyre koordinatoreve në qeverinë ‘Haradinaj’? Pse duhet me pas ministër të kulturës, rinisë e sportit, e në të njëjtën kohë me u emëruar edhe një koordinator për kulture, rini e sport? A është detyrë e këtyre koordinatoreve koordinimi i ministrave dhe armatës së zv.ministrave? Apo ndoshta ky termi koordinator’ po shërben thjeshte për kamuflim, për ta rritur edhe më tepër numrin e kabinetit qeveritar”, thotë Murati.
Ai më tej emërimet e tilla i sheh të turpshme, të pakuptueshme dhe të paprecedentë.
“Për 1.7 milion banorë, një ushtri e tërë e shërbyesve civil e politik. Me gjithë këtë fuqi punëtore, Kosova do të duhej të bëhej Zvicër. Fatkeqësisht nuk do të bëhemi. Po paguajmë paga për militantë partiak që duhet të rehatohen nëpër institucione”, shprehet Murati.
Agron Demi nga Instituti për Studime të Avancuara (GAP), thotë se pasi qeveria tejngopi administratën shtetërore me zv.ministra, agjenci, tash ka nisur një rend të ri të pozitave të larta shtetërore, atë të koordinatorëve.
Sipas tij, personat që po emërohen në pozita të tilla do të duhej të mbuloheshin nga ministrat ose nga zëvendësministrat.
“Tash kjo nuk ndalet deri sa të emërohet nga një koordinator për secilën fushë. Goxha injorant duhet me qenë e mos me u bërë nervoz me këtë kërdi që është ka bahet në taksat tona”, thotë Demi.
Valmir Ismaili, nga organizata Demokraci Plus thotë se në cilësinë e të ashtuquajturve koordinator, qeverise “Haradinaj” i shtohen praktikisht edhe tre ministri. /tesheshi.com/
