Raundi i tretë kualifikues i Champions League-s është shoqëruar me rezultate befasuese, me një sërë skuadrash të njohura që i kanë mbyllur papritmas llogaritë e tyre në këtë aktivitet futbollistik me prestigj.
Fillimisht duhet thënë se Partizani nuk ia doli dot ndaj Salcburgut, duke e humbur takimin e dytë 2-0. Gjithsesi, skuadra tiranase do të ketë mundësi të luajë në playoff-in e Ligës së Europës, për të shpresuar mbase dhe një pjesëmarrje në fazën në grupe.
Surpriza e parë është eliminimi i Shakhtarit të Donjeckut, skuadrës që për vite me radhë ka ofruar futboll të këndshëm, duke dominuar në futbollin ukrainas e duke u paraqitur shpesh mjaft mirë në futbollin europian.
Eliminimi ka ardhur nga zvicerianët e Jang Bojsit, që janë kualifikuar për në fazën play-off falë 11-metërshave. Dy takimet kanë patur të njëjtin rezultat, 2-0, si për njërën dhe për tjetrën skuadër. Penalltitë i kanë dhënë të drejtë Jang Bojsit të vazhdojë më tutje.
Irlandezët e Dundalkut kanë eliminiuar Bate Borisovin, duke fituar 3-0 në takimin e dytë, ndërsa e kishin humbur sfidën e parë 1-0.
Crvena Zvezda pati marrë një rezultat pozitiv, 2-2, në takimin e parë në Bullgari ndaj Ludogorecit. Por në Beograd, miqtë bullgarë fitojnë 2-4 pas shtesave nga 15 minuta, duke siguruar dhe kualifikimin.
Skuadra e njohur belge e Anderlehtit u eliminuar papritmas nga rusët e Rostovit. Barazimi 2-2 i 90 minutave të para nuk u vlejti belgëve, që humbën në shtëpi 0-2.
APOEL-i qipriot i eliminoi norvegjezët e Rosenborgut në një ndeshje që tërë dramacitetin e ruajti për në momentet e fundit. Rosenborgu kishte fituar 2-1 në takimin e parë, për të humbur 3-0 në të dytin. Në Qipro ndodh çudia, teksa të tre golat e APOEL-it shënohen pas minutës së 90-të, në të 92-tën, 97-tën dhe në të 98-tën.
Fenerbahçja po ashtu u dorëzua para Monakos, që humbjes 2-1 një javë më herët në Stamboll iu përgjig me një fitore 3-1.
Skuadra e njohur e Olimpiakosit të Pireut u eliminua papritur nga Hapoel Be’er Sheva. Izraelitët patën barazuar pa gola në Athinë, e në vendin e tyre u mjaftoi një fitore minimale, 1-0, për kualifikimin.
Ekipet e eliminuara do të luajnë në playoff-in e Ligës së Europës. /tesheshi.com/
