Ndryshe nga paraardhësi i tij, Donald Trump e ka ftuar presidentin egjiptian, Abdel Fattah el-Sisi, për një vizitë në Shtëpinë e Bardhë.
Një vizitë që do të konkretizohet në fillim të muajit të ardhshëm, më 3 prill. Kjo do të jetë vizita e parë e presidentit egjiptian në Uashington që prej marrjes së detyrës tre vite më parë.
Trump e El-Sisi patën biseduar në telefon më 23 janar, ndërsa shtatorin e shkuar qenë takuar në Nju-Jork.
Egjipti dhe SHBA-ja janë aleatë të ngushtë prej dekadash; Egjipti merr nga SHBA-ja një ndihmë ushtarake të përvitshme prej 1.3 miliardë dollarësh.
El-Sisi udhëhoqi në 2013-n rrëzimin ushtarakisht të të parit president të Egjiptit të zgjedhur në mënyrë demokratike, Muhammad Morsi-t. Një vit më pas ai do të zgjidhej president. Marrëdhëniet e tij me Barack Obama-n nuk qenë kurrë të ngrohta. /tesheshi.com/
