Ekuipazhi i anijes shqiptare “Oriku” ka shpëtuar nga vdekja disa emigrantë sirianë, që ndodheshin në bordin e një gomoneje. Sipas të dhënave zyrtare, në gomone ndodheshin 18 fëmijë, 12 gra dhe 23 burra.
Lajmin e ka bërë të ditur Ministrja e Mbrojtjes Olta Xhaçka, e cila ka shkruar në rrjetin social se pak orë më parë, ekuipazhi i “Orikut” ka mundur të shpëtojë nga deti Egje 53 emigrantë sirianë.
Sipas saj, kjo ngjarje i bënte krenarë atë dhe Forcat e Armatosura shqiptare, pasi në një vit e gjysëm, janë shpëtuar plot 600 emigrantë.
“Ekuipazhi i anijes “Oriku”, pjesë e Forcës Detare, me mision në detin Egje gjatë patrullimi, pak orë më parë i ka shpëtuar jetën 53 emigrantëve nga Siria.
18 fëmijë, 12 gra dhe 23 burra janë tani shëndoshë e mirë falë kontributit të djemve dhe vajzave tona në Egje.
Në 18 muajt e përfaqësimit të Shqipërisë në operacionin e NATO-s në detin Egje, “Sea Guardian”, ekuipazhi shqiptar ka shpëtuar 600 emigrantë. Kemi të gjitha arsyet për tu ndjerë krenarë për burrat dhe gratë, djemtë dhe vajzat në uniformë të Republikës së Shqipërisë! Kam kënaqësinë të ndaj me ju këto foto nga operacioni i shpëtimit sot dhe të ekuipazhit ditën e nisjes për në mision!”, shkruan Xhaçka. /tesheshi.com/
