Situata e acarur dhe kërcënimet nga Serbia kanë bërë bashkë në një tryezë, ekspert sigurie, deputet e analist ku kanë shprehur brengat e tyre për sigurinë dhe për sfidat që e presin vendin gjatë këtij viti.
Në tryezën me titull “Sfidat e sigurisë së Kosovës 2017”, të organizuar nga Qendra Kërkimore për Politika të Sigurisë (SPRC) dhe Friedrich Ebert Stiftung (FES), u tha se institucionet duhet që në mënyrë urgjente të transformojnë Forcën e Sigurisë në mision të ri ushtarak dhe të mbrojtjes, si dhe të ndërtojnë kapacitetet e plota në mënyrë të mos realizohet projekti i Serbisë për dështimin e shtetit.
Burim Ramadani nga SPRC-ja, këtë vit e përshkroi të rëndë për sigurinë në vend, me ç’rast tha se qëllimi i tryezës është të identifikojë sfidat e sigurisë dhe të rekomandojë politika të institucioneve të Kosovës në çështje të sigurisë.
Ndërsa, zv. ministri i Punëve të Brendshme, Nehat Mustafa përmendi katër kërcënime të cilat sipas tij e kërcënojnë sigurinë e vendit.
“Tensioni me Serbinë, ekstremizmi i dhunshëm që shpie në terrorizëm, krimi i organizuar dhe, më i rëndësishmi, shtrirja e ndikimit rus në Kosovë përmes mekanizmave që ajo i kontrollon”, tha ai.
“Veriu i Kosovës është bombë e kurdisur, por kjo situatë është duke u monitoruar në vazhdimësi”, tha zv. ministri Mustafa.
Deputeti i LDK-së, Nuredin Ibishi theksoi rëndësinë e mbikëqyrjes parlamentare mbi sektorin e sigurisë gjatë kësaj periudhe dhe për strategjinë e re të sigurisë kombëtare që duhet të hartohet.
“Me ndryshimin e Ligjit për FSK-në të bëhet i mundur ndryshimi i misionit të FSK-së, që të ecën rrugës së vet të ngritjes së kapaciteteve”, tha deputeti Ibishi.
Ish-komandanti i FSK-së, gjeneral Kadri Kastrati theksoi domosdoshmërinë e transformimit të FSK-së në Forca të Armatosura, duke shprehur bindjen e tij se çështjet e mbrojtjes duhet të trajtohen seriozisht.
“Nuk është e ndaluar që FSK-ja të ketë armatim të mbrojtjes. Qeveria dhe Parlamenti në mënyrë urgjente duhet t’i bëjnë ndryshimet ligjore për t’i hapur rrugë FSK-së në modernimin, armatimin dhe misionin e ri ushtarak”, tha gjeneral Kastrati.
Avokati dhe analisti politik, Dastid Pallaska përmendi tri grupe kërcënimesh ndaj sigurisë kombëtare.
“Kërcënimi i parë është ndryshimi i rendit botëror, produkt i të cilit rend para disa vitesh ka qenë edhe shpallja e pavarësisë së Kosovës. Kërcënimi i dytë është procesi i delegjitimit të shtetësisë së Kosovës, përmes përpjekjeve të Serbisë dhe përmes diskursit politik të disa partive të papërgjegjshme dhe të papërgjegjësisë së Qeverisë. Kërcënimi i tretë është nocioni i shtetit të dështuar, ku përfshihet krimi e korrupsioni, keqqeverisja, paaftësia për krijimin e institucioneve që dalin nga zgjedhjet e të ngjashme”, tha Pallaska.
Ish-kryeministri, tani deputeti i PDK-së, Agim Çeku përmendi se vendi këtë vit përballet me pakënaqësinë qytetare, projektin e Serbisë që Kosova të jetë shtet i dështuar, si dhe ndryshimi i rendit botëror.
“Faktorë të jashtëm që ndikojnë në sigurinë e Kosovës janë edhe ekstremizmi i dhunshëm që shpie në terrorizëm dhe kriza e emigracionit”, tha Çeku.
Ndërkohë, për të ulur tensionet Kosovë-Serbi, mbrëmë është zhvilluar takimi i parë në Bruksel në nivel presidentësh e kryeministrash, takime që do vazhdojnë edhe në ditët në vijim. /tesheshi.com/
