Në dhjetë vitet e fundit qendra e Parisit ka shënuar një rënie të ndjeshme të numrit të banorëve. Vlerësohet se rreth 10,000 njerëz largohen nga kjo pjesë e qytetit çdo vit, dhe autoritetet e qytetit po përpiqen të ndalojnë këtë trend negativ.
Brenda kufijve të përcaktuar nga unaza e trafikut “Peripherique”, Parisi ka aktualisht 2.1 milionë banorë, që është 140 mijë më pak se në vitin 2013. Në të njëjtën kohë, rajoni më i gjerë Ile-de-France, i cili rrethon qytetin, është shtëpia e më shumë se 12 milionë njerëzve.
Ikja e popullsisë nga kryeqyteti më i dendur i Bashkimit Evropian shqetëson autoritetet e qytetit. Këshilli i qytetit po përgatit një diskutim për planin e ri urban (PLU), të propozuar nga kryebashkiakja Anne Hidalgo së bashku me aleatët e saj politikë.
Synimi i planit është rritja e cilësisë së jetës në qytet për të ndaluar largimin e familjeve dhe shtresës së mesme.
Masat kryesore synojnë rritjen e disponueshmërisë së banesave të përballueshme dhe përshtatjen e qytetit ndaj ndryshimeve klimatike. Mirëpo, propozimi i planit urban shkaktoi kritika të ashpra nga opozita, shkruan revista Fortune. /tesheshi.com/
