Një raport analitik i një grupi ekspertësh shqiptarë dhe europianë mbi politikën shqiptare mësohet se është dorëzuar këto ditë në qarqe të rëndësishme në Bruksel.
Burime të tesheshi.com mësojnë se materiali përmban të dhëna të frikshme mbi politikën shqiptare, dhe në radhë të parë për mazhorancën. Materiali, i cili është hartuar në gjuhën angleze, përmban një vështrim të përpiktë të veprimtarisë jashtëparlamentare të deputetëve.
“Parlamentarët shqiptarë në një numër të konsiderueshëm jetojnë në luks, kanë banesa shumë të shtrenjta, veshje dhe makina luksoze, ndërkohë që bëjnë fundjava në resorte turistike të shtrenjta jashtë Shqipërisë. Paga e një parlamentari është pak më shumë se 1400 euro,” thekson raporti.
Ai ndalet një për një, duke i përmendur të gjithë deputetët me emër, zgjedhjen e tyre në Kuvend, mundësitë financiare, të dhënat kriminale, por edhe të biznesit, si dhe dyshimet që kanë shërbime apo agjenci të ndryshme.
Por kjo pjesë e raportit është jashtëzakonisht top secret, dhe nuk bëhet e ditur nga burimi që e informoi faqen elektronike tesheshi.com mbi ekzistencën e këtij dokumenti të rëndësishëm dhe mbi pjesë të tij.
Përveç klasifikimit të të gjithë deputetëve, raporti bën një ndarje të qartë të lidhjeve që deputetët e mazhorancës dhe të opozitës kanë me qarqe jashtëpolitike, ku hidhet dyshimi i përfitimit jo sipas ligjit.
Në vija të përgjithshme, një pjesë e këtij dokumenti analizon deputetët e mazhorancës, me emërimet klienteliste dhe jashtë merite të disa prej drejtorëve dhe zyrtarëve në institucionet vendore në varësi qendrore dhe bashkiake.
“Ndërkohë, më shqetësuese është lidhja kapilare që kanë deputetët me ente dhe institucione shtetërore, duke emëruar drejtorë dhe krerë të ndryshëm. Qarkullojnë të dhëna se për emërime të ndryshme merren edhe ryshfete, por deri tani nuk ka pasur asnjë denoncim. Nga ana tjetër, çka përbën më tepër rrezik është funksionimi klientelist, me ndërmarrje dhe shoqëri në duart e shtetit. Kompani që qarkullojnë vlera të mëdha parash kontrollohen nga parlamentarët. Një deputet shumë i fuqishëm i mazhorancës, i cili ka lidhje të forta me kryeministrin Edi Rama, ka emëruar kreun e Agjencisë Shtetërore të Karburanteve dhe drejtorin e Ujësjellësit të Tiranës; dy ndërmarrje që qarkullojnë shuma të mëdha parash,” theksohet ndër të tjera në materialin e analistëve që kanë punuar për llogari të organizmave të rëndësishme europiane.
Siç mësohet, materiali ka një aneks të veçantë edhe për deputetët e ndarë në parti, pra, PS-ja veç, LSI-ja veç, PD-ja dhe të tjerët veç.
Por një aneks të shkruar me bold materiali e ka për parlamentarët që edhe pse nuk kanë rekorde direkte kriminale, kanë lidhje dhe operim me qarqe të rëndësishme të lidhura me krimin. Dhe në këtë pikë mësohet se ka një shprehje që thotë se, “qarqet e nënpolitikës e gjejnë konsensusin më shpejt se ato lart në parlament. Ose, siç analizohet më tej, e gjitha që bëhet është thjesht teatër.”
Materiali mësohet se nuk përbën ndonjë suprizë për misionet ndërkombëtare në Tiranë, pasi ato prej kohësh përgatisin informacione periodike që janë thënë e stërthënë si nga ambasadori Donald Lu, nga ai gjerman, Helmut Hoffman, apo nga ajo e BE-së, Romana Vllahutin. /tesheshi.com/
