Nga redaksia
Një burim kofidencial nga Ministria e Mjedisit dhe e Planifikimit Hapësinor në qeverinë e Kosovës, i ka ofruar portalit tesheshi.com një hartë, e cila kompromenton rëndë marrëveshjen e bërë nga autoritetet kosovare lidhur me vijën e demarkacionit me Malin e Zi, ku dyshimet janë për humbjen e afro 9 mijë hektarëve tokë, gjë e cila është shndërruar prej muajsh dhe në çshtje politike, bashkangjitur Asocacionit të Komunave Serbe.
Dhe ashtu siç kjo e fundit, edhe Demarkacioni është përfshirë në ligjërimin opozitar në të ashtëquajturën tradhëti e interesave të Kosovës nga e qeverisë “Mustafa”
Ndërkohë që, një vendim i fundit dhënë nga një komision ndërkombëtar mbi korrektësinë e marrëveshjes për demarkacionin, nuk ka mundur dot të shuajë zërat se aty ka vërtet “tradhëti”.
E gjithë barra e akuzave bie mbi shefin e Agjencionit Kadastral e njëherësh kreun e komisionit qeveritar për përcaktimin e vijës kufitare me Malin e Zi, Murat Meha.
Dhe ja pra, portalit tesheshi.com, i është dhënë një hartë që vetë Agjensioni Kadastral i Kosovës ia ka dorëzuar në vitin 2011 Departamentit Amerikan të Shtetit, sipas së cilës bie në sy ajo që pretendohet nga ana e kundërshtuesve të marrëveshjes, se Kosova vërtet po humb rreth 9 mijë hektarë tokë.
Burimi ka shtuar se asnjëherë deri më tani kjo hartë nuk është bërë publike nga ana e agjensionit të kryesuar nga Murat Meha, duke pretenduar se kjo hartë i nxjerr të gjitha të palarat rreth Demarkacionit.
“Hartën që ka siguruar portali tesheshi.com, është harta me e saktë që ka Agjensioni Kadastral i Kosovës, por kjo hartë kurrë nuk është bërë publike pas një urdhri gojor që ka lëshuar Murat Meha”, ka thënë burimi nga brenda MMPH-së.
“Nuk dua të komentojë deklaratat e opozitës; Demarkacioni nuk është vetëm çështje politike, por është dhe çështje patriotike e atdhetare e personave që janë në komisionin qeveritar; e pse Meha është duke shkuar në drejtim të tradhtisë kombëtare, për këtë nuk kam shpjegim”, ka thënë burimi i cili përligj qëndrimet e tij pikërisht nëpërmjet asaj çka tregon harta.
Sipas tij, rugovasit kanë plotësisht të drejtë se pse nuk e pranojnë këtë Demarkacion. “Sepse ata të gjithë e dinë se ku është vija kufitare; Çakorri, Kulla e Zhlebit, Vaganica, Pllanica etj, të cilat janë pjesë e territorit të Kosovës dhe kurrë nuk kanë qenë pjesë e territorit të Malit të Zi”, saktëson ai, duke shtuar ata kurrë nuk kanë paguar për kullota në këto pjesë, por i kanë marr me qira tokat-livadhet e pjesës matanë këtyre vendeve.
Për të, Murat Meha, në rolin e drejtor të Agjensionit Kadastral të Kosovës dhe si kryetar i komisionit qeveritar për caktimin e vijës kufitare të Kosovës me Malin e Zi, ka bërë lëshime të mëdha, me ç’rast mbi 9 mijë hektarë tokë të Kosovës ia ka dhënë Malit të Zi, akt ky që ka dëmtuar rëndë sovranitetin e Republikës së Kosovës.
“Andaj, i bëjë thirrje publike kryeprokurorit të Shtetit, Aleksandër Lumezit, që të fillojë menjëherë hetimet rreth këtij njeriu për pasurinë milionëshe që ka bërë si dhe për dyshimin se është korruptuar nga ana e malazezëve”, ka shtuar burimi.
Burimi nuk ka pranuar të komentojë formimin dhe punën e komisionit ndërkombëtar rreth Demarkacionit me Malin e Zi, por ka theksuar se ky komision është farsë, siç thotë “vetëm sa për t’iu qitur hi syve rugavasëve dhe të gjithë qytetarëve të Kosovës.” /tesheshi.com/
