Nis nesër në Egjipt turi i parë elektoral për të zgjedhur Presidentin e Republikës.
Abdel Fattah Al Sisi, kreu aktual i shtetit i ardhur në pushtet 5 vjet më par pas një grushti shteti, pritet të fitojë pasi realisht nuk ka opozitë reale përballë.
Opozita e vërtetë, “Vëllazëria Muslimane” janë nxjerrë jashtë ligjit.
Në zgjedhjet presidenciale do të votojnë 60 milionë egjiptianë nga 95 milion që është popullsia totale.
Pas tërheqjes së tre kandidatëve që mund ta sfidonin realisht Al Sisin dhe arrestimit të dy ushtarakëve që shfaqën dëshirën të kandidojnë, përballë gjeneralit ndodhet një person i panjohur, Moussa Mostafa, i cili në dy mitingjet që ka zhvilluar është deklaruar si admirues i Al Sisit.
Edhe në vitin 2014, ish-kreu i ushtrisë egjiptiane pati vetëm një rival që mori vetëm 3% të votave.
Presidentin që rrëzoi me grusht shteti, Mohamed Morsi-në e ka futur në burg.
Al Sisi është i shqetësuar se mund të ketë abstenim të madh, sa në një intervistë që dha para pak ditësh tha se duhet që “të votojnë të gjithë, edhe ata që janë kundër meje, pasi duhet t’i tregojmë botës se qeverisemi nga populli ynë”.
Zeid Ràad al-Hussein, kreu i Agjencisë së OKB-së për të Drejtat e Njeriut, tha se zgjedhjet në Egjipt po zhvillohen në një atmosfere kërcënimesh dhe presionesh. /tesheshi.com/
