Presidenti egjiptian Abdel-Fattah al-Sisi nënshkroi ligjin e kontestuar kundër terrorizmit që sanksionon dënimin me vdekje për disa vepra të lidhura me terrorizmin, e sipas grupeve të të drejtave të njeriut vendos de facto një gjendje të jashtëzakonshme në vend.
Ligji i ri dënon me vdekje gjithkënd që gjendet fajtor për formim apo drejtim të grupeve terroriste, ndërsa financimi i këtyre grupeve sjell dënim me burg të përjetshëm.
Ata që gjenden fajtorë për nxitje të dhunës apo krijim faqeje interneti që konsiderohet se përhap mesazhe terroriste do të marrin dënime nga pesë deri në shtatë vjet burg.
Sipas ligjit, militantët e dyshuar do të dënohen me shpejtësi nga gjykata speciale dhe ata që shpallen fajtorë mund të marrin deri në 10 vjet burg.
Gazetarët që publikojnë versione të ngjarjeve që bien në kundërshtim me ato zyrtare, do të paguajnë gjoba deri në 64 mijë dollarë.
Drafti origjinal parashikonte burgim për këta gazetarë por u amendua pas protestës së sindikatës së gazetarëve.
Grupet e të drejtave të njeriut e denoncuan ligjin si një ligj që imponon “gjendje të jashtëzakonshme të padeklaruar”.
Presidenti Sisi, një ish shef i lartë ushtarak u zotua për ligje më të ashpra kundër terrorizmit që nga vrasja muajin e kaluar të prokurorit të Përgjithshëm, Hisham Barakat në Kajro.
Egjipti mbetet i përfshirë nga trazirat që pas rrëzimit të presidentit të parë të zgjedhur në mënyrë demokratike, Mohamed Morsi me një grusht shteti në vitin 2013. /tesheshi.com/
