Nga Mensur Krasniqi
Një lajm i mirë për tetovarët. Nga sot e tutje banorët e qytetit të Tetovës do të thithin ajër më të pastër, por lajm i keq është se do mbeten rreth 1000 njerëz pa punë. Udhëheqësia e Kombinatit “Jugohrom” të Tetovës, fabrikë kjo e cila llogaritet si shkaktare që Tetova të renditet si qyteti më i ndotur në evropë, ka vepruar pas vendimit të Inspektoratit Shtetëror për Mjedis Jetësor, i cili dsolli vendim që kombinati t’i ndërpret të gjitha furrat për shkak të mosrespektimit të afatit të fundit për vendosjen e filtrave, që skadoi para dy ditëve.
Drejtori i përgjithshëm i “Jugohromit”, Vasko Skenderovski, deklaroi se prej mbrëmë Kombinati ka filluar etapa – etapa t’i fikë furrat dhe deri në mesnatë të gjitha do të ndalen.
“Ne patjetër duhet ta respektojmë vendimin e Inspektoratit. Megjithatë, ky vendim do të duhej ta konstatojë edhe qeveria. Pasi që, prej atje nuk ka kurrfarë njoftimi, ne do ta respektojmë vendimin e Inspektoratit”, deklaroi Skenderovski.
Ai shtoi se ekipet e tyre do të vazhdojnë me ndërtimin e filtër – stacioneve, themelet e të cilave tanimë janë vendosur.
“Patjetër duhet të them se stacioni i filtrave do të duhej të ndërtohet, por shumë pritëm për të fituar leje për ndërtimin e tij”, shtoi Skenderovski.
Ndërsa udhëheqësi i lëvizjes për mbrojtjen e mjedisit ”Eco Guerilla”, Arianit Xhaferi, ende është në dilemë nëse “Jugohromi” do të mbyllet përfundimisht deri në vënien e filtrave, apo është vetëm një fushatë parazgjedhore e partive në pushtet.
”Hapi i parë i rëndësishëm, por duhet të shohim sa gjatë do ngelet mbyllur. Deri në vënien e filtrave apo vetëm sa të kalojnë zgjedhjet. Do kërkojmë info për të parë çfarë saktë po ndodh. Nëse nuk është mbyllur deri në vënien e filtrave, atëherë i shërben vetëm fushatës parazgjedhore… të presim e të shohim. Pa eufori.”, ka shkruar në profilin e tij në facebook, Arianit Xhaferi. /tesheshi.com/
