Kryeministri Avdullah Hoti ka anulluar vatjen në Uashington për takimin e pritshëm të 27 qershorit në Shtëpinë e Bardhë, duke bërë që projekti amerikan i rinisjes së dialogut Prishtinë – Beograd, me qëllim arritjen e një marrëveshjeje historike mes dy vendeve, të dështojë.
“Për shkak të zhvillimeve të reja në Prishtinë si rezultat i aktakuzës të paraqitur nga Prokuroria e Specializuar, unë duhet të kthehem në vendin tim për t’u marrë me situatën. E njoftova Ambasadorin Grenell se nuk mund të marrë pjesë në takimin e 27 qershorit në Shtëpinë e Bardhë”, ka shkruar Hoti në Twitter.
Pasoi reagimi i Grenellit i cili shkroi: “Unë e respektoj vendimin e tij për të mos marrë pjesë në diskutimet, derisa të zgjidhen çështjet ligjore të këtyre pretendimeve”, ka shkruar i dërguari amerikan, njeriu i investuar fuqishëm për rinisjen e dialogut, i ngarkuar me këtë mision nga Presidenti Trump.
Publikimi një ditë më parë nga Specialja në Hagë, i një aktakuze për presidetin Thaçi, përfshirë dhe Kadri Veselin, është lexuar si një akt komplotist me prapavijë europiane, për të pamundësuar rolin e veçuar amerikan në këtë proces. Dhe kjo u arrit. Takimi i Uashingtonit ka dështuar.
Më herët, BE paralajmëroi SHBA se nuk mund ta zgjidhnin pa Brukselin çështjen e Kosovës, e se kjo çështje u përkiste më së shumti europianëve. /tesheshi.com/
