Ertan Shakiri është një djalosh me aftësi të kufizuara. Ai njihet në rrethin e besimtarëve muslimanë të Shkupit, ngase pos devocionit, interpreton edhe ilahi (këngë me motive fetare të bazuara vetëm në vokal).
Pak vite më parë ai do bëhej edhe më i njohur, pasi presidenti turk, Erdogan, gjatë një vizite në kryeqytetin maqedon, do i premtonte e më pas do ia sillte, një karrocë me rrota që ai të mund të lëvizte lirisht sipas nevojave, por sidomos për rrugën nga shtëpia në xhami.
Dhe mu kjo rrugë është bërë shkak që ai të marrë këtë fund-Ramazani një dhuratë shumë të veçantë nga tre persona të cilët nuk dihen se cilët janë.
Për çdo ditë, Ertani ecte disa qindra metra rrugë më tepër nga fakti se karroca e tij nuk mund të ngjitej në tatëpjetën e rregullt të xhamisë.
Kështu disa djelmosha kanë marrë një iniciativë ku me pak sakrificë dhe shpenzim simbolik, i kanë mundësuar një shteg alternativ. Aty, duke e shtruar me beton, kanë bërë dhe dedikimin përkatës: “Ertan të duam”.
I befasuar nga kjo dhuratë e rrallë, vështirë e imagjinueshme, ai ka shkruar në facebook:
“Dua t’ju tregoj se sot tre persona të cilët vendosën që të ma lehtësojnë hyrjen në xhami duke ma bërë rrugën më lehtë. Me të vërtetë kemi nevojë për kësilloj njerëzish humanë.
Fjala human, d.m.th të kesh zemër, shpirt, me një fjalë të gjithë të mirat e kësaj bote. Humaniteti nuk bëhet vetëm me para por dhe me zemër e vepra që u shërbejnë njerëzve.
I falenderoj këto tre persona që me të vërtetë kanë bërë një punë, një vepër të madhe për t’ja lehtësuar rrugën njeriut me aftësi të kufizuar.
O ju njerëz, merrni shembull prej këtyre burrave të medhenj”, ka shkruar nën emocione të forta Ertan Shakiri. /tesheshi.com/
