PDIU i bashkohet qëndrimit të LSI-së duke shtuar presionin ndaj PS-së. Shpëtim Idrizi nën presionin e deputetit të tij, Aqif Rakipi, emri i të cilit është në listën e prokurorisë për dekriminalizimin…
Një aleancë e re po shfaqet në arenën politike shqiptare e cila është shumë dinamike çdo ditë që afrohet afati i regjistrimit në zgjedhjet e reja. PDIU, e njohur si partia e çamëve, ka vendosur t’i bashkohet lëvizjes së LSI-së së Ilir Metës. Vendimi është marrë pas një takimi mes kreut të PDIU-së, Shpëtim Idrizi me kreun e LSI-së, Ilir Meta dhe qëndrimit të tij publik që paralajmëronte daljen nga koalicioni qeverisës me PS-në.
Burime pranë PDIU-së thanë për tesheshi.com se vendimi i kësaj partie është ndikuar nga presioni i brenda partisë, konkretisht nga deputeti i Elbasanit, Aqif Rakipi, i njohur si Qifja i PDIU-së. Një njeri me shumë influencë në PDIU dhe tek vetë kryetari Idrizi, Qifja njihet si i “forti” i partisë. Emri i tij është në listën e prokurorisë që po heton deputetët në bazë të ligjit të dekriminalizimit, por heqja e mandatit të tij nuk u bë realitet siç ndodhi me deputetë dhe kryebashkiakë të tjerë. Ai njihet dhe për një incident të dhunshëm në Kuvend kur qëlloi me grusht deputetin socialist Alfred Peza, i zgjedhur në zonën e Peqinit.
Rëndësinë e tij për vendimet politike duket se e di dhe vetë kryeministri Edi Rama, i cili u fotografua duke pirë kafe kokë më kokë me Qifen një ditë të diele, 19 shkurt, 24 orë pas nisjes së protestës nga opozita.
Çfarë do të thotë një aleancë Meta-Idrizi
Fill pas një darke së bashku ku Meta e Rama mund të kenë rënë dakord vetëm për cilësinë e ushqimit, kreu i LSI-së darkoi me Shpëtim Idrizin, aleatin tjetër në bashkëqeverisje. Mbajtja e frymës tek Idrizi ka qenë lëvizja e fundit politike që Meta bëri pasi deklaroi se vendet e tij në qeveri ia ofronte opozitës. Fill më pas Idrizi foli për një pakt kombëtar mes të gjitha partive dhe propozoi disa pika për zgjidhjen e krizës.
Tashmë Rama gjendet nën presion e dy aleatëve të tij pa votat e të cilëve nuk i bën dot 71 sosh për të mbajtur qeverinë në këmbë deri në zgjedhje. Sot ai ka takuar sërish Metën dhe më tej është këshilluar me tre socialistët më influentë sot në parti, Erion Veliaj, Saimir Tahirin dhe Gramoz Ruçin.
Në këtë situatë asnjë teori e politikës nuk jep përgjigje pasi loja luhet nga aktorët politikë dhe matet me fuqinë e tyre; jo vetëm nga fuqia e votave në Kuvend por dhe nga pushteti i “të fortëve” brenda tyre. /tesheshi.com/
