Ka startuar me një grup kriminal në Fier, ashtyquajtura “forca e ligjit”, një fushatë e promovuar ditë më parë me ardhjen e dy ekspertëve të FBI-së, që mëton të ç’rrënjosë krimin e organizuar në Shqipëri.
Të arrestuarit, të konsideruar dhe si “të fortë” nga Fieri e Shijaku, u prangosën në lokalin e shtetasit Kujtim Kuçi, i arrestuar gjithashtu si pjesë e grupit.
“Shtetasit e ndaluar, si anëtarë të grupit të strukturuar kriminal, dyshohet se ndër vite në bashkëpunim me njëri-tjetrin kanë trafikuar lëndë narkotike të llojit kokainë, heroinë dhe kanabis sativa, brenda dhe jashtë Shqipërisë. Gjithashtu, ky grup kriminal që operonte kryesisht në zonën e Fierit, dyshohet se ka qenë i përfshirë në disa ngjarje të rënda si vrasje, rrëmbim personi, për të cilat po vijojnë hetimet intensivisht”, informoi drejtori i Policisë Fier, Albert Nushi.
Të arrestuarit janë: Kujtim Kuçi, 45-vjeç banues në fshatin Sulaj, Fier, Bashkim Ahmeti, banues në fshatin Sulaj Fier si dhe Dritan Tusha, 47 vjeç, lindur dhe banues në Shijak. /tesheshi.com/
