Polica e Shkodrës ka ndaluar njërën nga edukatoret e përfshira në dhunën ndaj fëmijëve jetimë në shtëpinë e fëmijës parashkollor. Edvana Sulaj, 40 vjeçe, është ndalur, ndërsa dy edukatorët e tjerë Albert Rekaj, 32 vjeç dhe Manjola Banishta, 42 vjeçe, janë lënë të lirë, ndërsa do proçedohen penalisht.
Mësohet se Edvana Sulaj, personi që shihet në video duke u ulur mbi fëmijën,në dëshminë e saj fillimisht nuk ka pramuar të jetë fajtore duke pretenduar se video ka qenë e montuardhe është bërë me qëllim që dikush t`i zërë vendin e punës.
Pasi hetuesit i kanë treguar disa herë videon dhe pamundësinë e të qënurit e montuar, ajo ka ndryshuar mendim duke thënë se ndihet fajtore dhe se ky rast është i vetmi që ka ndodhur gjatë punës së saj gati 20-vjeçare në këtë institucion.Ajo ka shfaqur pendim.
Ndërkohë,opinioni publik në Shkodër ka reaguar ndaj këtij rasti duke kërkuar ndëshkim të edukatorëve si dhe drejtuesve të këtij institucioni që edhe pse nuk janë përgjegjës direkt pasi nuk shfaqen në video, kanë treguar paaftësi në drejtimin e një strukture që ka 22 fëmijë jetimë.
Aq më tepër që drejtorja ka hequr gjithë përgjegjësinë nga vetja duke theksuar se i ka pushuar nga puna dhe paditur në prokurori, ndërsa ka deklaruar se punonjëset ishin të kualifikuara. Rreth 3 tre muaj më parë, tre fëmijë që ndodheshin në këtë institucion u kthyen në familjet biologjike.
Pamjet e shfaqura janë rregjistruar ndërsa fëmijët dhe edukatoret prisnin furgonin që do i transportonte në qendër pasi kishin qenë në një aktivitet.Akuza për tre edukatorët është “Keqtrajtimi i të miturit”, dhe “Shpërdorimi i detyrës”.
