Kryeministri, Edi Rama, ka marrë letër i laps dhe i ka shkruar direkt rivalit të tij Lulzim Basha ku i kërkon të ulen bashkë në tryezë për të gjetur një akord politik për reformën në drejtësi.
Në letrën e tij, Rama thekson se një takim i tillë nuk do të ndërhynte në marrëdhëniet aktuale politike, apo në komisionet e rëndësishme, por shton se do të jetë një mekanizëm më shumë në komunikimin mes palëve politike.
“Në këndvështrimin tonë, ky forum i përbashkët, nuk do të zëvendësojë apo paralelizojë asnjë instancë tjetër të komunikimit institucional, të përhershëm apo të përkohshëm, mes koalicionit qeverisës dhe opozitës. Ky, sipas nesh, do të ishte, natyrisht nëse edhe ju do të keni të njëjtin vullnet si edhe ne për të diskutuar hapur, sy më sy, sipas axhendave e modaliteteve të dakordësuara plotësisht, një mekanizëm më shumë në komunikimin e nevojshëm mes palëve politike në Shqipëri. Le të provojmë t’u japim qofte njerëzve tanë e qoftë partnerëve të këtij vendi provën e një vullneti të përbashkët për t’i dhënë mosdakordësisë politike mes palëve, një përmasë kaq të munguar civilizimi”, shkruan Rama.
Kreu i mazhorancës ia lë liderit të opozitës caktimin e formatit dhe protokollit të taskimit.
“Ne jemi gati, po ju a jeni gati?”, mbyll Rama letrën e tij.
/tesheshi.com/
