Edi Rama e ka mbyllur fushatën me një mesazh që nuk i drejtohej kundërshtarit të tij politik, Lulzim Basha; por vetëm elektoratit të pavendosur dhe atij që pritet të votojë LSI-në dhe partinë e Ben Blushit.
Nga Vlora, ku tashmë prej 4 vitesh është bërë traditë mbyllja e fushatës së PS-së, Edi Rama deklaroi se kush nuk voton do të ndihmojë në frenimin e vettingut dhe reformës në drejtësi.
Kreu i PS-së që është sërish deputet i qarkut Vlorë, zgjodhi pikërisht Lungomaren, një nga projektet e tij të rilindjes urbane si log i tubimit final.
“Nëse ka një vend që i bën bashkë Kosovën dhe Shqipërinë, ajo është Vlora”, u shpreh Rama, teksa theksoi se ky qytet do të ishte edhe vendi që ai do të kalonte ditët e tij të fundit.
Por kryetari i PS-së, ka shkuar më tej në ofensivën politike ndaj LSI-së:
“I kërkoj falje çdo qytetari për çdo abuzim në zyrat e shtetit. Nëse ka një gjë që më bën më njerëzor përpara çdo qytetari është sjellja e neveritshme e administratës. Kjo nuk është administrata që duam”, theksoi Rama.
Dhe pikërisht në kulmin e fjalës së tij, Rama ka pa përmendur edhe reformën në drejtësi. “Zvarritja e reformës në drejtësi nga partitë e tjera që përpiqen të flasin bukur për të, por nuk e duan suksesin e reformës në drejtësi, nuk duan pastrimin rrënjësor që Vettingu do t’i bëjë pallatit të drejtësisë”, tha Rama nga Vlora, ku ka sulmuar edhe Lëvizjen Socialiste për Integrim, duke u shprehur se “Çiflig për LSI në shtet, nuk do të ketë më”.
As kreu i LIBRA-s nuk i ka shpëtuar kryeministrit Rama, i cili theksoi se “pas siglave të reja, fshihet një tepsexhi i vjetër”. /tesheshi.com/
