Edhe deputeti Halit Valteri është i idesë se pas tentativës së brendshme për t’ja marrë Rudina Hajdarit drejtimin e grupit parlamentar demokrat, qëndron vetë kreu i PD-së Basha.
I ftuar në Top Talk, ai e quanti “puç” atë që po ndodhte në radhët e demkoratëve brendaparlamentarë.
“Ky puç është organizuar nga Partia Demokratike sepse ndodhi fill pas 5 kërkesave që Partia Demokratike kishte për reformën zgjedhore dhe një nga këto kërkesat ishte anashkalimi i Komisionit për Reformën Zgjedhore. Një nga tre deputetët ka patur qëndrime të ndryshme nga grupi dhe nga vendimet që kemi marrë më parë.
Janë njerëz që përdoren nga PD dhe faktorë të jashtëm. Janë edhe njerëz që financohen nga njerëzit e drejtësisë, të cilët përdorin karriget e opozitës për t’u mbrojtur. Një nga deklaratat e zotit Korab Lita ishte pse kemi denoncuar në Prokurori koncesionet PPP”, tha Valteri.
Më parë, gjatë paradites, vetë znj.Hajdari akuzoi kreun demokrat se po tentonte ta godiste atë, me qëllimin për të goditur përfaqësimin në tryesën e Reformës Zgjedhore.
Siç dihet, lidershipi opozitar jashtëparlamentar, i ka kërkuar mazhorancës si kusht që të ulet në tryezën e reformës, që mos ta njohën opozitën e re si opozitë reale. /tesheshi.com/
