Vala e emigrantëve që kalojnë përmes Serbisë, e hyjnë kryesisht nga Maqedonia ka bërë që në Beograd të ngrihen zëra që kërkojnë marrjen e masave nën shembullin e Hungarisë.
Partia Popullore Serbe apeloi autoritetet e Beogradit të veprojnë si ato hungareze e të ngrenë gardh mbrojtës nga emigrantët përgjatë kufirit me Maqedoninë.
“Është koha e fundit të fillojmë të sillemi si çdo shtet tjetër perëndimor, i cili në vend të parë e ka interesin e vet e jo atë të të tjerëve”, thuhet në deklaratën e kësaj partie.
“Në Serbi, thuhet në apel, nuk kemi qëndrim zyrtar se për çfarë kategori të njerëzve bëhet fjalë, përveç se çdo ditë arrijnë lajme alarmante prej qarqeve zyrtare se deri në fund të vitit do të paraqiten rreth 100.000 kërkesa për azil, gjë që neve do na kushtojë 150 milionë euro”.
Ndërsa Europa përballet me fluksin e madh të emigrantëve, sidomos nga vendet e varfra dhe në luftë, Hungaria ka marrë masën ekstreme të ngritjes së barrierave në kufi. Kjo gjë duket se do të merret si shembull edhe nga vende të tjera që shërbejnë si tranzit për emigrantët. /tesheshi.com/
