Kryeministri Ramush Haradinaj ka anolluar një mbledhje të kabinetit të tij për të dhënë llogari para ambasadorëve lidhur me ligjin që pritet të kalojë në Kuvend që shfuqizon Specialjen, një zhvillim i beftë që ka kapur në befasi ndërkombëtarët.
Haradinaj, në bisedë me ambasadorët e SHBA-së, Britanisë së Madhe, Gjermanisë, Francës, Italisë dhe përfaqësuesin e Zyrës së BE-së në Kosovë, u ka thënë se ligji do të votohej në Kuvend – siç ishte planifikar për të premten në mbrëmje – qeveria e tij do ta përkrahte – në kuptimin kushtetues të fjalës – duke sqaruar se e obligim zbatimin e vendimeve të dala nga Kuvendi me forcën e kartonit.
“Nëse do ishte votuar dje, do të ishte ligj për mua. Nëse jo, mbesim në obligimet që i ka dhënë Kuvendi më parë”, deklaroi Haradinaj në mbledhjen e AAK-së që u mbajt pas takimit me ambasadorët. Pra, ia ka “lënë topin” Kuvendit, lidhur me këtë zhvillim delikat; por pa e fshehur qëndrimin e tij politik kundër Speciales, me arsyetimin se ajo e dëmton imazhin e Kosovës.
“Kemi votuar ‘Jo’ në opozitë, jemi edhe sot ‘Jo’ për Specialen. Çkado që kemi thënë ‘Po’ në opozitë, është ‘Po’ sot. Me ndryshim të punës nuk ndryshojnë bindjet tona. Nëse të tjerët kanë shitur kauza, ne jemi kauzë vet. Është e padrejtë për Kosovën edhe pse kemi shumë telashe. Ia rëndon imazhin ndërkombëtar. Titujt kanë me u bo nëpër botë ‘Gjykata e Kosovës’, ‘trafiku i organeve’, ‘krimet e luftës’ e sene tjera”, deklaroi Haradinaj.
Mbetet të shihet reagimi i Presidentit Thaçi si dhe ai kryekuvendarit Veseli. /tesheshi.com/
