Lista Serbe nuk është partia e vetme e minoritetit serb që është kundër ushtrisë së Kosovës. Edhe Partia liberale serbe e Slobodan Petroviçit, SLS ka shprehur qëndrim se do vendosin ashtu siç u thotë Beogradi.
“Në pushtet jem qe shtatë vjet dhe gjithmonë e kemi pasur këtë lloj presioni. Deri më tani 100 herë kemi mundur të votojmë për Ushtrinë e Kosovës, por për këtë duhet të vendosë Beogradi dhe cili do që të jetë vendimi i tij, ne do t’i qëndrojmë prapa”, ka thënë Petroviç, duke shtuar se ushtria është çështje serioze për të cilën Prishtina e Beogradi duhet të merren vesh në Bruksel.
Petroviç mendon se partia e tij do të zërë tri vende në Kuvend dhe shton se pavarësisht nga ofertat që nga liderët shqiptarë do t’u bëhen, nuk beson se ndokush nga serbët do të ngrinte gishta për Ushtrinë e Kosovës, sepse, tha ai, “ajo nuk është temë e tyre”.
Pas përplasjeve mes Listës Serbe dhe Partisë serbe të Kosovës të Aleksandar Jabllanoviçit në Beograd tashmë ka zënë vend frika se në parlament mund të gjenden parti serbe që do të votonin për formimin e ushtrisë pasi që me Kushtetutë serbët në Kuvendin e Kosovës duhet t’i kenë 10 deputetë. /tesheshi.com/
