Sot është zyrtarizuar pranimi i degës së Kosovës në organizatën DoCoMoMo International (Dokumentimi dhe konzervimi i modernizmit), e cila merret me mbrojtjen, promovimin dhe konzervimin e lëvizjes moderne në botë.
DoCoMoMo e cila ka mbi 140 anëtarë (degë shtetërore & partnerë institucionalë) anë e mbarë botës, zyrtarisht pranoi degën e Kosovës në kongresin e saj, që u mbajt në shtator në Lisbonë.
“Krijimi i DoCoMoMo’s në Kosovë dhe pranimi i saj në DoCoMoMo International do të thotë shumë për mbrojtjen e arkitekturës moderne në Kosove, e cila deri tash se voni në përgjithësi është neglizhuar nga institucionet dhe publiku”, thotë Bekim Ramku, udhëheqësi i DoCoMoMo Kosova.
Nismëtarët e degës së DoCoMoMo’s në Kosove para disa muajve përfituan grantin prestigjioz nga Getty Foundation “Keeping it Modern” për draftimin e planit konzervues për Bibliotekën Kombëtare të Kosovës, objekt ky i cili edhe përfaqëson më së miri arkitekturën moderne në Kosovë. /tesheshi.com/
