Nga Blendi Gashi
Ndërsa amabsadorët Donald Lu dhe Romana Vlahutin janë vënë në shënjestër që prej angazhimit të tyre ndaj reformës në Drejtësi në Shqipëri, edhe kolegët e tyre në Kosovë jo rrallëherë ballafaqohen me kritika nga politikanë të ndryshëm.
Kjo ndodh në çastin kur diplomatët perëndimorë haptazi kritikojnë krerët e shtetit për dështime, dhe pse deri atë çast këta të fundit janë treguar të nënshtruar ndaj fjalës së tyre.
Më e freskët është një përplasje mes kryeministrit Isa Mustafa dhe ambasadorit britanik Ruairi O’Connell.
E gjitha pas kritikave që bëri ky i fundit për ngecje të memorandumit që ambasada britanike nënshkroi me qeverinë më 15 gusht për mbikëqyrjen në përzgjedhjen e kandidatëve për poste të larta në bordet e institucioneve të pavarura publike.
O’ Connell, një nga nënshkruesit e këtij memorandumi, ka vënë në dyshimin jetësimin e memorandumit, duke shprehur nervozizmin e tij për mosimplemtimin e kësaj marrëveshjeje.
Por kjo kritikë aspak nuk i ka pëlqyer Mustafës i cili i është përgjigjur me një gjuhë të pazakontë ambasadorit britanik, duke shkuar aq thellë sa mundohet t’i tregojë atij se si duhet të sillet e çfarë të flasë.
“Zhgënjimi nuk është punë e ambasadorëve, ata duhet të vazhdojnë të jenë pozitiv në vendin ku janë të thirrur të shërbejnë. Nuk ja takon ambasadorëve që të zhgënjehen me vendin ku janë thirrur të shërbejnë. Zhgënjimin duhet ta mbajnë për vendin nga vijnë. Këtu ju mbetet ta mbajnë pozitivitetin”, ka thënë Mustafa, në një intervistë për KTV-në.
Vërtetë kjo deklaratë tregon qartë fytyrën e shefit të ekzekutivit kosovar, i cili përveç kundërshtarëve politikë, shihet se aspak nuk e ka problem t’i godet edhe ambasadorët kur ata e kritikojnë.
Por Mustafa duhet ta ketë të qartë se O’ Connell, si një nga nënshkruesit e marrëveshjes ka të drejtë të shprehë pakënaqësinë e tij por edhe të mos ofrojë më përkrahje për çështjen të cilën është nënshkruar ambasada.
Në anën tjetër është e çuditshme si i njëjti person, pra Mustafa, kur amabsadorët dalin pro qeverisë, siç është rasti i marrëveshjes së Demarkacionit me Malin e Zi, i përdor ata për interesa të caktuara, dhe për të goditur opozitarët duke u thënë se “janë kundër ndërkombëtarëve”.
Për marrëdhëniet e ndërtuara nga pushtetarët me ndërkombëtarët kohë më parë ka shprehur pakënaqësinë e tij edhe opozitari Albin Kurti, i cili shihet nga pushteti si “armik” i ndërkombëtarëve.
Kurti, ka thënë se politikanët vendas janë servilë ndaj atyre ndërkombëtarë për interesa të ngushta personale, duke shtuar se me të huajt duhet ndërtuar marrëdhënie partneriteti.
“Serviliteti i politikanëve vendas ndaj atyre ndërkombëtarë nuk bëhet për hir të shtetit e të popullit, por ka si motiv interesat e ngushta personale”, deklaroi kohë më parë Kurti.
Mbetet të shihet në ditët në vijim nëse ambasadori britanik do reagojë ndaj deklaratave të Mustafës, apo do zgjedh heshtjen për të mos filluar një “luftë” me kreun e qeverisë. /tesheshi.com/
