Tashmë të gjithë vendet e Bashkimit Europian e kanë kompletuar qëndrimin e tyre politik për zgjedhjet e 18 qershirit: Rëndësi ka që të jenë të ndershme e të lira, të marrë pjesë kush ttë dojë.
Sot pas disa selive diplomatike të SHBA dhe vendeve të BE-së, edhe ambasada holandeze në Tiranë deklaroi se do të njohë zgjedhjet e 18 qershorit edhe pa pjesëmarrjen e opozitës.
“Pas konsultimit me ambasadat e tjera dhe delegacionin e BE-së në Tiranë, Holanda u bën thirrje të gjitha forcave politike që të vazhdojnë dialogun në përpjekje që zgjedhjet të mbahen sipas standardeve ndërkombëtare dhe me pjesëmarrjen e të gjitha partive. Udhëheqësit politikë duhet të jenë të përgjegjshëm për stabilitetin e vendit.
Shqiptarët, meritojnë zgjedhje me pjesëmarrjen e të gjitha partive politike dhe megjithëse do të na vinte keq nëse opozita i bojkoton, vetë zgjedhjet do të vlerësohen në bazë të standardeve ndërkombëtare”, theksohet në deklaratë.
Kjo është një tjetër goditje për opozitën dhe paralajmërimin e saj për bojkot. Po ashtu, paralajmërime të forta ndërkombëtare i janë bërë opozitës dhe për Kavajën, që të kihet kujdes aty dhe mos destabilizohet situata. Dhe në fakt prova e forcës për PD-në do jetë pikërisht e diela në Kavajë, ku në këtë qytet do të zhvillohen zgjedhjet e pjesshme lokale. Kjo parti i ka bojkotuar ato, por ka paralajmëruar nga ana tjetër se nuk do lejojë zhvillimin normal të zgjedhjeve. /tesheshi.com/
