Edhe Berisha më së fundi do ketë një libër, por me pak gjasa për të qenë Best seller.
Në anglisht e jo shqip, ai ka diktuar një botim kushtuar asaj që e konsideron “farsë elektorale” të 14 majit, që nga kampi tjetër, mazhoranca, ishte një fitore spektakolare.
Libri mban titullin “Farsa elektorale e 14 majit 2023 në Shqipëri”, e teksa një rresht sipër saj shkruhet “Libri i zi i zgjedhjeve”.
Për ironi, autori diktues i këtij libri mban vulën e manipulimit më të madh zgjedhor në historinë post-komuniste të Shqipërisë, zgjedhjet e 26 majit 1996, e konsideruar ndryshe dhe si “masakër zgjedhore”, pasi ndodhi që disa kandidatë të PS-së së asaj kohe të dilnin dhe me zero vota në zonat e tyre parkatëse; pra mirë që për ta nuk kishte votuar as familja, por nuk kishin votuar as ata vetë për veten e tyre(!!!).
Gjithsesi, kjo nuk e përligj faktin se dhe PS-ja mund ta ketë abuzimet e saj zgjedhore dhe jo vetëm më 14 maj, të cilat, në fund të fundit, nuk e vënë në ndryshim rezultatin final.
Sa i takon librit, një të tillë shkroi dhe Basha para zgjedhjeve parlamentare të 2021-shit, për të cilin u përfol që ia ka shkruar Flutura Açka, e ardhur nga bota e letrave. Por libri politik i Bashës nuk pati kurrfarë suksesi apo lexueshmërie, së paku krahasimisht me “Kurban”-in e Ramës në 2011-ën, me disa ribotime, një libër që e ndihmoi goxha për të ardhur në pushtet.
Ndërkohë duhet kujtuar se për Berishën ka patur dikur një libër, shkruar nga Fahri Balliu në mesin e viteve 90-të, me titull “Berisha mes kasandrave”. /tesheshi.com/
