Simptomave problematike pas mitingut të PD-së nuk u ka shpëtuar as kreu demokrat, Basha. Edhe ky i fundit ka kaluar natën në spital së bashku me dhjetra të tjerë pjesëmarrës në miting, pasi shfaqjes së vatrave të skuqjes në lëkurë e sy. Kjo ka bërë që Basha të anullojë një tur takimesh elektorale të planifikuara për sot.
Nga PD deri më tani është thënë se në miting nuk ka patur lëndë plasëse, siç mund të jetë aluduar, apo që problemet të kenë ardhur nga tollumbacet.
Ndërsa në një deklaratë të fundit, Ministria e Shëndetësië, një dikastër që tashmë drejtohet nga opozita, sqaron:
“Në orët e para të mëngjesit të ditës së sotme (28 maj 2017) janë paraqitur në Qendrën Spitalore Universitare ‘Nënë Tereza’, pacientë me shenja të helmimit (intoksikacion) si: skuqje të syve, djegie të syve, irritim të shprehur të lëkurës në zonat e ekspozuara të fytyrës dhe qafës, si dhe në raste të veçanta edhe vështirësi të lehtë në frymëmarrje.
Sipas referimeve të marra nga mjekët në shërbim, të gjithë këta pacientë kanë qënë pjesmarrës në aktivitetin e hapjes së fushatës elektorale të Partisë Demokratike, një natë më parë në Bulevardin “Dëshmorët e Kombit”, në Tiranë.
Mes pacientëve, rreth orës 5:00 të mëngjesit është paraqitur edhe lideri i opozitës z.Lulzim Basha me simptoma të ngjashme.
Ministria e Shëndetësisë po punon për evidentimin e rasteve edhe në spitalet rajonale dhe qendrat shëndetësore në vend. Ndërkohë, në Qendrën Spitalore Universitare “Nënë Tereza” janë pjesa më e madhe e rasteve. 76 pacientë nga të cilët 9 janë shtruar në shërbimin e okulistikës dhe janë nën vëzhgimin e specialistëve.
Ministria e Shëndetësisë në bashkëpunim me Ministrinë e Rendit dhe Drejtorinë e Policisë po punojnë për zbardhjen e plotë të ngjarjes. /tesheshi.com/
