Ylli Pata
Një ditë pasi u sulmua shumë egër nga gazeta e rëndësishme greke “Kathimerini”, Edi Rama ka ndërmarrë një vizitë në Turqi, e cila shkaktoi një furtunë politike në Tiranë.
Një takim i rëndësishëm është mbajtur dje në Stamboll, ku ajka e kapitalizmit turk ka hedhur piketat konkrete për një togëfjalësh diplomatik që u kujtua se ishte harruar, përkatësisht “Partneriteti Strategjik Turqi-Shqipëri”. Ky takim ka trazuar menjëherë ujërat e politikës shqiptare duke sjellë reagimin e opozitës shqiptare, e cila siç duket e ka pritur keq këtë riaktivizim dhe ka synuar te hedhë mjergull që në fillim. Por që më pas u daravit si nga kryeministria ashtu edhe ambasada turke në Tiranë.
“Tryeza e Ideve”
Kryeministri shqiptar, Edi Rama, ka qenë i ftuari kryesor i këtij eventi, i cili është organizuar nga Ahmet Arslan, një nga njerëzit më influentë që lidh botën e politikës dhe atë të biznesit në Turqi. Rama ka diskutuar me një grup të madh instustrialistësh dhe sipërmarrësish turq për ofertën reale për këtë marrëdhënie, që u mboll menjëherë sapo PS erdhi në pushtet në qershorin e vitit 2013 dhe që u zvenit pikërisht pas tërmetit të tmerrshëm të Manisa në majin e vitit 2014.
E themeluar një vit e gjysëm më parë, “Fikiri Sofrasi” apo “Sofra e Ideve” është një think tank shumë i rëndësishëm në Turqi dhe është diskutuar gjatë gjithë ditës, mbi prioritetet e këtij “partneriteti Strategjik”, ku siç mësohet do të jetë energjia, thelbi i kësaj marrëdhënie. Futja e Turqisë në lojën e energjisë në Ballkan do të trondisë të gjithë panoramën aktuale duke ndryshuar ekuilibrat dhe sipas gjasave do të prishë situatën monopol të Serbisë.
Një hidrocentral i madh pritet të ndërtohet në kaskadën e Drinit, e kryesisht hidrocentrali i Skavicës, i cili përflitet se mund të jetë një “Fierzë” e re dhe do të kushtojë rreth gjysëm miliardi euro. Ndaj qeveria pritet ta japë me koncension.
Partia Demokratike akuzoi qeverinë se po bën marrëveshje të fshehta me një konsorcium turk për t’i dhënë koncensionin e Skavicës. Sipas PD, në këto bisedime është shmangur ambasada turke në Tiranë. Ka ardhur shpejtt përgjgja e fortë e qeverisë, e cila ka bërë të ditur se “ka mbaruar koha e marrëveshjeve të sekserëve nëpër hotele, por bëhet fjalë për diskutime e takime të organizuara nga konsullata shqiptare në Stamboll.
Ka reaguar më pas edhe ambasada e Turqisë në Tiranë, e cila ka qenë në një linjë me qeverinë. Në një deklaratë për shtyp ambasada sqaron se deklaratat e Kreshnik Çollakut, drejtues i Departamentit për Politikën e Jashtme në Partinë Demokratike, janë të pa baza. Në këtë deklaratë të Partisë Demokratike, sipas ambasadës thuhet se Ambasada e Turqisë në Tiranë është njoftuar për udhëtimin e Kryeministrit vetëm pasi ai ka mbërritur në Stamboll.
“Ambasada dhe Ministria e Punëve të Jashtme e Republikës së Turqisë janë informuar me kohë përpara vizitës jozyrtare që Kryeministri Edi Rama do të zhvillonte në Stamboll me ftesë të shoqërisë civile “Tryeza e ideve”. Falë bashkëpunimit të Konsullatës së Përgjithshme të Shqipërisë në Stamboll dhe Ambasadës sonë, u mundësuan të gjitha masat dhe shërbimet për sigurinë, protokollin, automjetet etj”- thuhet në reagimin e Ambasadës së Turqisë në Shqipëri.
Shqipëri-Turqi
Edi Rama, përpara se të zhvilloheshin zgjedhjet e 23 qershorit, zhvilloi një vizitë të shkurtër në Turqi ku është takuar me Kryeministrin e atëhershëm, Recep Tayyip Erdogan. Një vizitë e papritur që dha një drejtim se ku do të përvijojë politika e jashtme e qeverisë socialiste. Dhe në fakt, menjëherë sapo fitoi zgjedhjet e 23 qershorit 2013, Edi Rama me gjysmën e qeverisë së tij, zhvilluan vizitën e parë në Stamboll, ku janë pritur në Dollma Bahçe (rezidencën qeveritare të qeverisë turke), nga Kryeministri Erdogan dhe një pjesë e madhe e qeverisë së tij dhe drejtues të rëndësishëm të partisë së tij AKP. Në këtë takim u hodh ideja e “Partneritetit Strategjik” mes dy vendeve, ide që nisi të konkretizohej me propozime për mbledhje të përbashkëta qeverie dhe plane të mëdha bashkëpunimi.
Më 13 Maj të vitit të shkuar, në Tiranë do të vinte për një vizitë zyrtare, Kryeministri i atëhershëm i Turqisë, Recep Tayyip Erdogan, vizitë e cila u përgatit me shumë kujdes nga kreu i qeverisë shqiptare, Edi Rama. Por nuk ishte e thënë. Një tragjedi e rëndë ndodhi në një minierë në qytetin Manisa të Turqisë ku humbën jetën 157 minatorë dhe vizita u anulua. Më pas nisën telashet për Erdogan me protestat e Stambollit, fushata presidenciale, zgjedhja si kryetar i shteti, situata në Siri, ISIS që iu afrua kufirit me pushtimin e Mosulit, e të tjera. Marrëdhëniet me Shqipërinë u shtynë dhe mjaft komentatorë theksuan se ata u “harruan”.
Por ishte një sinjal i çuditshëm dy ditë më parë ra si “rrufe në qiell të pastër”. Në mënyrë të fortë, pa politesë diplomatike, Kryeministri Edi Rama, u sulmua nga gazeta më e rëndësishme greke “Kathimerini”, media e cila qëndron pranë qeverisë së Athinës. Rama u sulmua si “injorant në histori” dhe “diletant në diplomaci” duke iu referuar deklaratës për bashkimin me Kosovën. Por vetëm një ditë më pas, kur u nis në Stamboll, u kuptua qëllimi i atij sulmi nga gazeta që përcakton qëndrimet gjeopolitike të Greqisë.
Por në fakt, ajo që u duk e çuditshme, ishte sulmi i opozitës. Ka një analogji të hershme kur PD kundërshtoi privatizimin e Albtelekom tek korporata turke “Çalik”, por gjithsesi u ratifikua më pas nga vetë Berisha në vitin 2005. Megjithatë pritet që të mësohet më shumë gjatë ditës së sotme, kur të bëhet e ditur e gjithë axhenda e bisedimeve në “Tryezën e Ideve”.
/tesheshi.com/
