Ministri i Brendshëm në largim, Saimir Tahiri dhe një ndër ish-paraardhësit e tij në këtë post, Luan Rama janë ndeshur në distancë verbalisht duke sjellë në publik një debat të ashpër “kolonelësh” mes PS-së dhe LSI-së.
Dhe kjo ka ardhur në kulmin e një situate ku PD-ja ka rritur temperaturën e tensionit duke paralajmëruar edhe përplasje civile, madje edhe gjakderdhje nëse Fatmir Xhafa do të hyjë në zyrën e kreut të Rendit.
E gjithë kjo luftë ka në fakt një realitet i cili nuk mund të shmanget. LSI edhe pse është në koalicion me PS-në, në sulmin politik ndaj aleatit ka pasur të njëjtat argument me PD-në; madje në raste të tjera edhe më të egra duke përfshirë këtu dhe agresionin verbal të Ylli Manjanit apo Lefter Kokës.
Tashmë, në radhë të parë është Luan Rama, i cili siç e cilësoi Saimir Tahiri sot është zëdhënësi politik i LSI-së që komandohet në mënyrë piramidale nga Ilir Meta.
Çdo deklaratë e LSI-së nuk është një pushkë frëngjie, por një zjarr i hapur me urdhër të :komandantit të madh”.
Dhe Luan Rama si Sekretar i Përgjithshëm nuk është gjë tjetër vetëm se artileria e rëndë.
“Më e pakta, ka munguar eficenca e veprimit të organizuar shtetëror dhe të agjencive të zbatimit të ligjit për të mos lejuar krijimin e këtij realiteti. LSI-ja nuk ka bërë kurrë kërkesa”, tha Luan Rama.
Dhe Saimir Tahiri nuk ka vonuar t’i përgjigjet, duke e ftuar fillimisht që lexojë raportet e Departamentit Amerikan të Shtetit që flasin pikërisht për një situatë progresive lufte ndaj drogës.
“E shoh te udhes te saktesoj leximin e raportit te Departamentit Amerikan te Shtetit, sipas nje zedhenesi te LSI ne nje konference per shtyp sot.
Pa komentuar mbi kete lexim te pasakte, sipas te cilit fenomeni nuk qenka luftuar sa duhet, po ve ne dispozicion tekstin e 4 raporteve konsekutive te DASH ne 4 vite me radhe. Mjafton nje lexim krahasues per te kuptuar se sipas Departamentit te Shtetit, Shqiperia nuk u be burim i rendesishem i prodhimit te marihuanes as vjet e as parvjet, po njihej si i tille nga DASH qe para se te merrnim detyren.
Po ashtu, leximi krahasues mjafton per te kuptuar se e vetmja gje qe ka ndodhur, eshte fakti se ne kemi rritur me shifra e fakte, forcen goditese te Policise se Shtetit.
E di se qellimet politike te partive kundershtare apo konkurente me PS per te marre sa me shume vemendje e vota, justifikojne mjetet e propagandes partiake te secilit dhe vertetesia e atyre qe thone kalon rendom ne plan te dyte.
Por duke besuar se Levizja Socialiste per Integrim, si partner strategjik ne koalicionin qeverises i detyrohet vertetesise se fakteve te qeverisjes, nje vemendje te veçante, uroj qe leximi krahasues i raporteve te DASH per Shqiperine, ta beje edhe LSI te ndjehet krenare qe ka nderin e madh te jete aleate e PS ne kete faze historike reformash per vendin”, thekson Tahiri.
Pra, ministri i Brendshëm në detyrë e fton LSI të jetë aleate edhe në përmbajtje e veprave dhe reformave të qeverisjes.
Por nuk është drogë ajo që i detyruar të nxjerr “shpatën nga milli”. LSI dhe PS janë në shumëçka të ndarë. Reforma në Drejtësi është e para dhe qëndrimi ndaj ndërkombëtarëve është e dyta.
Ilir Meta dhe qarqet përreth tij thuajse kanë qëndrim të njëjtë me PD-në për ambasadorin Donald Lu dhe për zonjën Vllahutin.
Dje LSI votoi demonstrativisht kundër PS-së, ndërkohë që deri më sot nuk ka një qëndrim “pro” me vota ndaj propozimeve të Edi Ramës për ministra të qeverisë.
Ilir Meta ka thënë gjithmonë se është luajal në aleancë. Po a do t’i votojë LSI ministrat e sapopropozuar?!
Dy ditë më parë, Ilir Meta provoi një provë force në Kuvend për t’i treguar Edi Ramës se ai i ka të gatshëm plot 20 vota plus dy të Libra-s kundër PS-së në çdo rast.
Ndërkohë Petrit Vasli sot ka shkuar më tej duke e “pëshpëritur nën dhëmbë” një qeverie teknike.
Dhe problem më i madh nuk është thjesht e ashtuquajtura qeveri teknike, porse kush do t’i etë çelësat e kësaj qeverie.
Petrit Vasili ka folur pikërisht pas takimit të Edi Ramës me ambasadorët e BE-së dhe SHBA-së, duke i rënë pragut për të mos lejuar një marrëveshje të mundshme mes Edi Ramës dhe Lulzim Bashës për dalje nga cadra pa efektin “Meta” në mes, gjë që do e zhvlerësonte në maksimum këtë të fundit.
“Sigurisht, kërkesa për qeveri teknike, është një kërkesë maksimaliste. Ideja ka qenë se meqë kemi probleme të mëdha siç kemi problemet e drejtësisë, të kthehet opozita sa më parë me frymë mirëkuptimi në Parlament. Duam s’duam, kemi ca çështje të mbetura pezull që na lidhin me opozitën. Kjo kërkon një politikë kompromisi. A kemi detyrë si mazhorancë?
Kemi detyrë relativisht edhe më të vështirë, pasi mazhorancat kanë pushtet në dorë, sigurisht ka edhe detyra në raste të caktuara, kompromiseve të arsyeshme, që të tregojë tolerancë maksimale. Dhe kësaj tolerance nuk duhet t’i shmangemi sa të kemi mundësi. Të hulumtojmë çdo rrugë për të arritur tek kompromisi, duke përjashtuar ekstremizmat, ngado që të vijnë”, tha Vasili në emisionin e Dritan Hilës në Ora Neës.
Ky qëndrim i LSI-së së Ilir Metës përpara një prillit është një rritje pazari në maksimum jo vetëm e garës së presidentit, por siç bëjnë të ditur burime nga dy palët kanë të bëjnë me marrëveshjen për zgjedhjet e 18 qershorit.
Një burim diplomatik i tha tesheshi.com se ndërkombëtarët kanë mësuar se Edi Rama ndryshe nga viti 2013 nuk ka rënë dakord që të bëjë pazar me Ilir Metën për të ndarë portofolet përpara zgjedhjeve. Informacioni që qarkullon në ambjentet diplomatike është se Kryeministri i ka deklaruar Ilir Metës se “plaçka do të ndahet në fund”. Dhe më e forta: “Bashkë me Shpëtim Idrizin, natyrisht sipas votave të marra në zgjedhje. Dhe i ka premtuar se do ta bëjnë me “makinë llogaritëse”.
Meta nuk është hiç dakord dhe është tërhequr për vendim; që duket se do të jetë më afër PD-së sesa PS-së.
Por problem është i gjithë te imazhi. Nuk do t’i dukej bukur vetja në një koalicion parazgjedhor me Berishën dhe të tijtë, pasi duket si koalicioni anti-Vetting. Ndaj po shtyn Bashën në një triumf të fortë, që të justifikojë një koalicion eventual me Metën si zgjidhje krize ndaj “djallit” Rama, që do të përligjej nga një tollovi e madhe. E tipit? Siç e tha Basha sot: “nuk hyn Xhafaj në zyrën e vet vetëm mbi trupat tanë…” /tesheshi.com/
