Nga Mensur Krasniqi
Zbulohet e vërteta për mosvendosjen e tre përmendoreve shqiptare në qendër të Shkupit. Kreu i komunës Qendër, Andrej Zhernovski ka akuzuar partitë në pushtet BDI-në dhe VMRO-në se gjatë gjithë kohës kanë manipuluar duke keqpërdorur për përfitime politike tre përmendoret shqiptare që duhet të vendosen në kuadër të projektit “Shkupi 2014”, por që për momentin askund nuk figurojnë.
Sipas tij, në bazë të marrëveshjes, transporti dhe vendosja e përmendoreve bëhet nga kompania që ka marrë pjesë në ndërtimin e përmendoreve dhe jo komuna Qendër.
“Në datën kur ka filluar fushata e viti 2013 është bërë marrëveshje për shtyrjen e afatit për vendosjen e përmendoreve. Më pas, me ndërrimin e qeverisjes në komunën Qendër, filloi të bëhet presion për vendosjen e tyre. Komuna Qendër, as që e di dhe as që duhet ta dijë se ku janë ato përmendore”, deklaroi kryetari i kësaj komune, Andrej Zhernovski.
Ai sqaroi se ka kontradiktë mes vendimit të qeverisë dhe marrëveshjes me kompaninë, dhe se është e qartë se kjo bëhet për qëllime politike.
Sipas tij, qeveria ka kërkuar që komuna të bëjë transportin dhe vendosjen e përmendoreve, edhe pse nuk është e obliguar, andaj kjo komunë ka kërkuar që në seancën e ardhshme të Kuvendit të anulohet vendimi për transportin e përmendoreve të figurave të shquara shqiptare të Nexhat Agollit, Josip Bagerit dhe Pjetër Bogdanit nga komuna Qendër, ndryshe këto figura do të ngelen peng i qeverisë VMRO-BDI. /tesheshi.com/
