Ministrja e Jashtme e Kosovës, Donika Gervalla-Schwarz, në një bisedë për mediat gjermane ka paralajmëruar mundësinë e një lufte të re në Ballkan.
“Nëse bashkësia ndërkombëtare vazhdon të tolerojë veprimet e Serbisë, do të ketë një luftë të re”, tha Donika Gervalla-Schwarz në një intervistë për transmetuesin publik Deutschlandfunk dhe kërkoi nga bashkësia ndërkombëtare të marrë masa kundër Serbisë.
“Vuçiç do të ndalet vetëm nëse BE-ja vendos sanksione kundër Serbisë. Ne gjithashtu duhet të kërcënojmë me ngrirjen e negociatave për anëtarësim në Bashkimin Evropian nëse Beogradi nuk i ekstradon përgjegjësit për ngjarjet e tetë ditëve më parë dhe heq dorë nga sulmi ndaj Kosovës dhe të gjitha vendeve të tjera të rajonit”, tha gruaja që përfaqëson diplomacinë e Prishtinës.
Ajo tha se Serbia dëshiron të “krijojë fakte të reja” për ta detyruar Kosovën të pajtohet me lëshime territoriale në negociatat në Bruksel.
“Fatmirësisht tentativa tetë ditë më parë dështoi, por kush e di se çfarë do të sjellë e ardhmja… Qëllimi i Beogradit është të pushtojë një pjesë të territorit të Kosovës. Nuk është hera e parë që Vuçiç e vendos ushtrinë në kufirin me Kosovën”, tha Gervalla-Schwarz.
Shtëpia e Bardhë tha të premten se Serbia po kryen gjithashtu një vendosje ushtarake “në shkallë të gjerë” dhe “të paprecedentë”, duke përfshirë artileri, tanke dhe trupa, përgjatë kufirit. /tesheshi.com/
