Ministri i Rendit Bledi Çuçi ka përgëzuar uniformat blu për kapjen e një personi, i cili pasditen e kësaj të marte ekzekutoi të vëllanë me kunatën për çështje pronësie.
“Përgëzime Policisë së Tiranës që në kohë rekord arrestoi autorin e dyshuar të ngjarjes së rëndë me dy jetë të humbura. Të vendosur për të goditur krimin, me bindjen se vetëm kështu krijojmë siguri për shoqërinë dhe nuk vëmë në rrezik të ardhmen tonë”, shkruan kreu i Rendit.
Por për çfarë vrasësi është fjala që duhen përgëzuar forcat e rendit?
Ai nuk është një figurë krimi për të shfaqur të tillë entuziazmi.
Arsen(ose Hamza) Maskurti, personi vrasës, është, sipas klasifikimit, një person krejt i zakonshëm, në konflikte tipike të zakonshme brenda familjes, sado ekstreme, të cilët kanë dhe fund tragjik. Por ai nuk është rrezik shoqëror nga ata që një shoqëri ka ankth prej tyre. Vrasësi nuk është pjesë e të fortëve apo e atyre kriminelëve gjakftohtë, të cilët pas kanë lënë viktima në rrugë vijojnë jetën nën rrezik minimal për t’u kapur nga policia.
Kështu që ministri Çuçi nuk ka për ç’të përgëzojë Policinë.
Vetëm javët e fundit janë 5 të ekzekutuar në mënyrë mafioze. Pyetje për Çuçin: ku janë ekzekutuesit e tyre?
Pasi të keni kapur ndonjë nga ata, atëherë edhe mund të përcillen përgëzime.
Më herët, ministri përcolli përgëzime dhe për kapjen e një të shumëkërkuari turk, jo për krime por për mashtrime.
Statusi qe po aq naiv. “Arrestimi i shtetasit turk të shumëkërkuar nga Interpoli një tjetër dëshmi e efikasitet gjithnjë e në rritje të policisë kriminale shqiptare. Përgëzime të gjithë oficerëve që morën pjesë në operacion. Tolerancë zero për krimin e organizuar!”, shkroi Çuçi. Po për cilin krim të organizuar e ka fjalën?
Turkut s’i atribuohen vrasje, ndërsa krimi i organizuar në Shqipëri, nuk ka dyshim që po jeton “ditët e veta” të një pushteti gati të pacenueshëm. /tesheshi.com/
