Mbrëmja e ditës së djeshme ka qenë e mbushur me finale kupash në një numër vendesh të Europës. Dhe në tërë këto finale kanë ngadhënjyer skuadrat e mëdha, duke mos sjellë asnjë surprizë.
Në Angli, në “Wembley”, Mançester Junajtedi e ka fituar për të 12-tën herë FACup-in, duke barazuar rekordin e Arsenalit. Mes zërave për largimin e Van Gaal-it, “djajtë e kuq” kanë fituar 2-1 ndaj një Kristëll Pallasi që ka bërë një paraqitje mbresëlënëse.
Eshtë dashur të luhen shtesat nga 15 minuta për të përcaktuar fituesin, pasi loja e rregullt pati përfunduar 1-1. Me një lojtar më pak në fushë, Mançesteri ka fituar 2-1, falë golit të Lingard-it në minutën e 110-të.
Kjo mund të ketë qenë ndeshja e fundit për teknikun holandez, ndërsa më së fundi BBC-ja njoftoi për zëvendësimin e tij me Mourinho-n.
Bajerni i Mynihut ka fituar dhe Kupën e Gjermanisë. Në finalen ndaj rivalëve të Borusias së Dortmundit kanë vendosur 11-metërshat në fund të 120 minutave.
Në stadiumin olimpik të Berlinit të tejmbushur, të pranishmit nuk kanë mundur të shohin asnjë gol gjatë
lojës. Lojtarët e Bajernit janë treguar më të saktë në goditjet nga pika e bardhë, duke fituar 4-3.
Më shumë se te trofeu, vëmendja ka qenë e përqendruar te tekniku spanjoll, Pep Guardiola, që është shfaqur i përlotur në fundin e takimit. Ai e lë aventurën trevjeçare me Bajernin, për të nisur një tjetër në Angli, ku do të drejtojë Mançester Sitin.
Ndeshje lamtumire ka qenë dhe për kapitenin e Borusias së Dortmundit, Hummels-in, që tani e tutje do të veshë bluzën e Bajernit.
Shtesat 15-minutëshe janë luajtur dhe në stadiumin olimpik të Romës, ku Milani dhe Juventusi kanë diskutuar mes tyre Kupën e Italisë. Të fituar nga “Zonja e vjetër”, që nuk ngopet me marrjen e trofeve.
Ndaj një Milani kërkues në një pjesë të mirë të lojës, torinezët e kanë gjetur rrugën e rrjetës në minutën e 110-të, me shënues spanjollin Alvaro Morata.
Fitorja 1-0 e Juventusit e lë kështu Milanin jashtë Ligës së Europës, duke ia mundësuar këtë gjë Sasuolos.
Juventusi i fiton për të dytin vit radhazi kampionatin e kupën, duke e konfirmuar dominimin e vet në futbollin italian.
Një tjetër lamtumirë ka patur në “Stade de France” të Parisit, ku Ibrahimovic ka luajtur ndeshjen e fundit me fanelën e PSG-së.
Suedezi u ka dhënë fund viteve të tij te PSG-ja me një dygolësh në finalen e Kupës së Francës ndaj Olimpikut të Marsejës.
Kjo ka qenë finalja e së shtunës me më shumë gola. PSG-ka fituar 4-2 ndaj Olimpikut të Marsejës, duke i
fituar tre titujt sezonalë në futbollin francez.
Dy prej golave mbajnë firmën e Ibrahimovic-it, njëri prej të cilëve i shënuar me 11-metërsh.
Ende nuk dihet saktësisht destinacioni i tij i ardhshëm, por përshëndetja e mbrëmshme për të ka qenë tepër e ngrohtë.
Ashtu si Juventusi në Itali, PSG-ja e dominon plotësisht futbollin në Francë.
Mbetet për t’u luajtur sot finalja e Kupës së Mbretit në Spanjë, mes Barcelonës dhe Seviljes. /tesheshi.com/
