Ushtria turke përjetoi një ditë më parë një ditë vërtet të dhimbshme që nga fillimi i ofensivës së saj kundër rebelëve kurdë në Sirinë veriore, pasi iu vranë tetë ushtarë.
Pesë sosh gjetën vdekjen kur një tank u sulmua në zonën Afrin, pas së cilës kryeministri turk Binali Yildirim tha se forcat kurde do të “paguajnë dyfish”.
Avionët luftarakë të Turqisë më vonë bombarduan pozicionet kurde në verilindje të Afrinit, njoftuan mediat britanike.
Operacioni i ushtrisë turke “Dega e Ullirit” filloi më 20 janar, me qëllim që të dëbonte njësitë e milicisë kurde të YPG-së nga rajoni.
Ankaraja e konsideron YPG-në grup terrorist, dhe një zgjatje e Partisë së jashtëligjshme të Punëtorëve të Kurdistanit (PKK), e cila ka luftuar për tre dekada kundër autoriteteve turke në juglindje të vendit, duke kërkuar autonomi.
Ushtria tha se YPG, i mbështetur nga Shtetet e Bashkuara, sulmoi një tank pranë Shejh Haruzit, në verilindje të Afrinit.
Më parë u vranë tre ushtarë, saktësoi komanda ushtarake.
Turqia ka humbur 15 ushtarë që nga fillimi i operacionit, e pretendon se ka eliminuar 900 luftëtarë kurdë, por kjo nuk është konfirmuar, njoftojnë agjensitë.
Yildirim përsëriti se qëllimi i operacionit ishte të shkatërronte atë që ai e quajti “grup terrorist” përgjatë kufirit turk.
Gjithashtu, u prononcua edhe presidenti Erdogan, i cili tha se forcat turke po përparojnë me sukses dhe se së shpejti do të marshojnë drejt qytetit të Afrinit. /tesheshi.com/
