E rrallë nga fushata në Kosovë: kandidates Vjosa Osmanit i shpërndahen postera pa dijeninë e saj

Fushata në Kosovë ka shënuar precedentin më të rrallë. Kandidatja e koalicionit LDK-AKR-Alternativa, Vjosa Osmani ka mbetur e shashtisur kur ka parë sot ambienteve publike postera me portretin e saj pa qenë fare në dijeni për një veprim të tillë.

Kjo e ka irrituar së tepërmi politikanen e njohur të partisë së Isa Mustafës, e cila ka vendosur  ta ndjekë dhe ligjërisht çështjen.

“Për informatën e të gjithë qytetarëve të Kosovës dhe organeve që po merren me organizimin e zgjedhjeve: Vjosa Osmani nuk ka shpërndarë nëpër Kosovë asnjë poster të vetëm, as në këto zgjedhje dhe as në zgjedhjet e kaluara. Kushdo që mund të ketë bërë një gjë të tillë pa u autorizuar nga unë e pa lejen time, është duke shkelur ligjin, dhe për këtë shkelje do të përgjigjet. Tani do të informojë policinë dhe KQZ-në për këtë shkelje dhe keqpërdorim të identitetit dhe emrit tim për interesa të ulëta që bien ndesh me rregullat e fushatës zgjedhore”, shkruan Osmani në Facebook.

Ky është ndër ato raste të rralla kur një kandidat (në këtë rast kandidate), ndihet keq kur sheh veten në postera fushate. /tesheshi.com/