Nga Musa Mustafa
Ka përfunduar studimet për Edukatë Fizike dhe ka dhënë e jep pikërisht këtë lëndë, por zellin më të madh të tij e ka jo tek bilbili, por tek të shkruarit me një kaligrafi të bukur të shqipes dhe…vetëm me stilograf.
Madje për këtë të fundit, Flamur Gacaferi, drejtor i shkollës fillore “Azis Sulejmani”, mund të quhet pa drojë një “stilografman”.
Që nga klasa e katërt e shkollës fillore e deri më sot, Gacaferi asnjëherë nuk ka shkruar në fletore apo ditar (në kushte arsimtari) me laps-kimik, por vetëm me stilograf.
“Stilografin e bukurshkrimin e kam pikën më të dobët të jetës sime, sepse nuk ka shkrim të keq, por ka vetëm dorë të keqe”, konkludon ai.
Gacaferi thotë se në sirtarët e tij, si në shkollë ashtu dhe në shtëpi, ka mbi 200 stilografë të llojeve të ndryshme, ku shumicën ia kanë dhuruar shokët e miqtë të cilët e njohin dhe ia dijnë merakun.
“Të gjithë stilografët i përdor, por Pelikan-in e kam dobësi dhe, tërë jetën time deri më tani ky lloj i stilografit më ka shoqëruar”, sqaron mësues Gacaferi.
Po si i lindi kjo “dashuri”?
Ka qenë një mësues nga Shqipëria, më saktë nga Tropoja, ai që ia ka injektuar Gacaferit dashurinë për bukurshkrimin shqip, e patjetër me stilograf, të cilit i është mirënjohës përjetë. Ai është Irman Pepshi, e që sot nuk rron më.
“Në vitet ’70, erdhën nga Shqipëria në Kosovë një numër i madh mësuesish për të na mësuar shkrim e këndim. Një fat të tillë e pata dhe unë”. Dhe citon më pas këshillën e artë të mësues Pepshit që i zuri vend në ndërgjegje: “Shkrim të bukur ka vetëm nëse e përdorni stilografin për të shkruar!”.
“Ishin këto fjalë që m’u nguliten në mendjen dhe zemrën time dhe ashtu i mbeta besnik mësuesit për bukurshkrimin me stilograf”, thotë Gacaferi.
Më tej ai sqaron se pas ca vitesh, marrëdhëniet diplomatike Jugosllavi-Shqipëri u prishën dhe të gjithë mësuesit e profesorët e ardhur nga Shqipëria u kthyen, fati të cilin e pati edhe mësuesi i tij nga Tropoja, Irman Pepshi.
“Dhe pas 32 vitesh, pas përfundimit të luftës në Kosovë, e kam takuar mësuesin Irman Pepshi në Mitrovicë, ku kishte ardhur për një vizitë tek miqtë dhe nxënësit e tij. Takimi me të ishte një përjetim në vete, ku i tregova se i kam mbetur besnik bukurshkrimit e stilografit.”
Pasionin e tij për bukurshkrimin e shqipes dhe stilografit për ta mundësuar atë, e dijnë të gjithë; sidomos ata që merren me arsim. Dhe mësues Gacaferi ka dëshirë t`i falenderojë shumë prej miqve, të cilët, duke ia ditur këtë të veçantë në personalitetin e tij, i kanë dhuruar sa e sa herë të shtrenjtin stilograf.
“Stilografin nuk ja jap askujt që ta përdorë, madje as fëmijëve e gruas sime, pasiqë kam frikë se m’i dëmtojnë”, thotë profesori i Edukatës Fizike, që siç kuptohet pra, më të çmuar se bilbilin ka mjetin me të cilin shkruan gjuhën e nënës.
Për më tepër, ai thotë se as postën elektronike nuk përdor deri në atë pikë sa të zhvlerësojë të shkruarit me dorë, me stilograf, ashtu bukur siç ia ka ënda dhe pasioni i pashuar.
“Miqve dhe të afërmëve nuk iu shkruaj me postë elektronike, por gjithmonë iu shkruaj me letër, sepse ashtu dëshiroj unë dhe ata njëkohësisht. Dhe nuk ka dyshim që është shumë më e bukur letra se e-maili”, pohon ai, duke u shprehur i dëshpëruar se teknologjia po shkakton shumë probleme.
“Jemi të përkushtuar që të punojmë me gjeneratat e reja që bukurshkrimin të mos tretet”, shton Gacaferi. /tesheshi.com/
