Edhe pse nuk njihet për sjellje apo stil jete modeste, ministri i Financave Arben Ahmetaj, ka këshilluar vartësit e tij në administratën tatimore që të tregohen të tillë me biznesin përgjatë fushatës nr.2 për kuponin tatimor, që pritet të nisë me datë 1 gusht.
Para këtij aksioni të ri qeveritar, i njohur dhe si “beteja për kuponin”, Ahmetaj u ka shkruar një letër njerëzve të terrenit që do jenë të angazhuar në këtë aksion, duke ndjekur kështu modelin e “letrave” të Ramës.
“Dëshiroj të ndaj me ju mesazhin tim shumë të qartë dhe të panegociueshëm, se objektivi ynë nuk është të vendosim gjoba, objektivi ynë është të ndihmojmë tatimpaguesit me durim, modesti dhe profesionalizëm që të zbatojnë detyrimin ligjor”, shprehet kreu i Financave shqiptare.
“Mos harroni për asnjë moment, që sado gabim të jetë, sipërmarrja meriton të ndihmohet, për shkak të risqeve që ka ndërmarrë ndër vite. Ligji është platforma jonë. Detyra jonë është të jemi këmbëngulës në zbatueshmërinë e ligjit, por jashtëzakonisht shumë modest dhe bashkëpunues me biznesin, sepse në këtë betejë ne dhe sipërmarrja qëndrojmë në të njëjtën anë”, thuhet mes të tjerash në letrën e ministrit Ahmetaj. /tesheshi.com/
