Liderit demokrat, Basha e ka pasuruar ligjërimin e tij politik në kuadër të protestës së opozitës para Kryeministrisë dhe me fjalën “luftë”. Me një gjuhë tejët të ashpër e cila të kujton atë të Berishës, paraardhësit të tij në krye të PD-së, Basha tha se një luftë e nisur mes shumicës dërrmuese të shqiptarëve ndaj pakicës që mban peng Shqipërinë.
“Nëse duan luftë, luftë do të ketë. Shpojini gomat, thyejuni dyert e dritare dhe nxirrini jashtë! Momenti po vjen ku nuk do të gjeni vrimë miu për t’u futur, kur zemërata popullore të ngrihet. Ju bëj thirrje të gjithëve të marrim përgjegjësitë tona, të reagojmë orë e minutë për çdo padrejtësi, mos ktheni faqen tjetër por qëllojini me grusht”, tha Basha.
“Ky është sistemi kriminal, kasta kriminale, republika kriminale që duhet përmbysur me çdo kusht, me çdo kusht, përmbysur dhe varrosur për t’i hapur rrugën një republike të drejtësisë, demokracisë dhe zgjedhjeve të lira dhe të ndershme. Jo kriminelët, jo kodoshbiznesmenët dhe politikanët e korruptuar, kjo nuk është thjesht një protestë, një luftë që ka nisur mes shumicës dërrmuese të shqiptarëve që kanë vendosur ta marrin fatin e tyre në duart e tyre duke marrë zgjedhjet në duart e tyre dhe një pakice që do ta mbaj Shqipërinë peng e të burgosur duke mbajtur peng zgjedhjet e lira dhe të ndershme”, theksoi njeriu në krye të opozitës shqiptare. /tesheshi.com/
