Russia Today sapo ka lajmëruar se presidenti rus e ka urdhëruar ministrin e Mbrojtjes, Sergey Shoigu, të nisë tërheqjen e forcave ushtarake nga Siria prej ditës së nesërme.
Një zhvillim i papritur, i arsyetuar nga Putin-i me arritjen e objektivave.
“Konsideroj se objektivat e vendosura për Ministrinë e Mbrojtjes janë arritur përgjithësisht. Kjo është arsyeja pse urdhëroj nisjen e tërheqjes së pjesës kryesore të grupit tonë ushtarak nga territori i Republikës Arabe Siriane duke nisur nga e nesërmja,” mësohet të ketë thënë Putin në një takim me ministrin e Mbrojtjes dhe atë të Jashtëm, Shoigu dhe Lavrov.
Fushata ajrore ruse në Siri nisi në 30 shtatorin e vitit të shkuar. Operacionet ruse kanë qenë vendimtare për përparimin e ushtrisë së regjimit sirian në ofensivën e muajve të fundit.
“Me pjesëmarrjen e ushtrisë ruse, forcat e armatosura siriane dhe forcat patriotike siriane kanë qenë në gjendje të arrijnë një përmbysje fundamentale në luftën kundër terrorizmit ndërkombëtar dhe kanë marrë iniciativën në thuajse çdo aspekt,” ka shtuar Putin.
Megjithatë, Rusia do të ruajë një prani ushtarake në Siri. Ndërkohë, nuk ka një njoftim për një afat të caktuar për tërheqjen e plotë të trupave. /tesheshi.com/
