Gjermania është konsideruar prej kohësh forca lëvizëse e Evropës. Por pasi u paralizua nga grevat e punonjësve të hekurudhave të zemëruar për pagat dhe kushtet e punës, e kombinuar me protestat e fermerëve në të gjithë vendin që po vazhdojnë prej tetë ditësh, ky vend po kthehet me shpejtësi në “të sëmurët e Evropës”, shkruajnë disa media europiane.
Problemet e Gjermanisë komplikohen më tej nga fakti se ajo qeveriset nga një koalicion tre-partiak i udhëhequr nga kancelari Olaf Scholz që nuk mund të bie dakord për asgjë dhe kjo favorizon partinë ekstremiste Alternativa për Gjermaninë (AfD).
Për shkak të pavendosmërisë, trazirave të brendshme dhe fajësimit të ndërsjellë për grevat, protestat dhe problemin e emigracionit gjatë “dimrit gjerman të pakënaqësisë”, analistët parashikojnë se e djathta ekstreme do të dalë mirë në zgjedhjet e mëvonshme të këtij viti.
David Young, një emigrant që jeton në Dusseldorf, përmblodhi me pak fjalë zemërimin dhe zhgënjimin e atyre që jetojnë në Gjermani që janë të indinjuar nga grevat.
“Kur ata bllokuan qytetin me traktorë, u krijua kaos. Njerëzit ende kanë njëfarë simpatie për fermerët, por
shumë pak njerëz e mbështesin grevën e hekurudhave. Ata kanë një kontratë të mirë dhe kjo që kërkojnë duket e paarsyeshme. Ndryshe nga shumica e punëtorëve, ata munden shkojnë në pension në 63, jo 67, kështu që njerëzit me të cilët kam folur nuk e ndiejnë se është shumë e vështirë për punëtorët e hekurudhave”, tha ai.
Avokati me bazë në Mynih, Jakob Unger tha se grevat do të shkaktonin probleme të mëdha nëse vazhdojnë.
“Nëse grevat hekurudhore vazhdojnë, do të ketë shumë probleme. Shumë njerëz përdorin rrjetin hekurudhor, jo vetëm për punë, por edhe për të udhëtuar nëpër vend. Është e çuditshme të shohësh foto të platformave bosh. Nëse kjo vazhdon në shkurt dhe mars, qeveria do të jetë në hall”, tha ai.
Këtë javë, rrjeti hekurudhor i Gjermanisë, i njohur normalisht për efikasitetin e tij, praktikisht u ndal dhe qendrat e ngarkuara të trenave të Këlnit, Berlinit dhe Frankfurtit heshtën.
Për t’i bërë gjërat edhe më keq, ata që u përpoqën të shkonin në punë me makinë hasën në autostrada të bllokuara nga fermerët grevistë dhe shoferë kamionësh.
Dhe me mjekët që kërcënojnë gjithashtu me grevë javën e ardhshme, Gjermania është në mes të një “dimri pakënaqësie” që filloi kur fermerët bllokuan qytetet me makineritë e tyre.
Fermerët po protestojnë kundër heqjes së subvencioneve të karburanteve, ndërsa punonjësit e hekurudhave kërkojnë ulje të orarit të punës.
Joachim Rukwied, president i shoqatës gjermane të fermerëve, tha se vendi drejtohej nga njerëz që “kurrë nuk punuan dhe nuk djersitën kurrë”.
Anëtarët e shoqatës thonë se nuk do të heqin dorë nga protestat masive dhe pas shtatë ditësh kaosi në rrugë, kancelari Scholz ra dakord për një reduktim gradual të subvencioneve në vend që t’u jepte fund atyre menjëherë.
Scholz, i cili morri detyrën nga Angela Merkel në vitin 2021, tha se shkurtimet e subvencioneve po zbatohen për të kursyer pothuajse një miliard euro nga buxheti i qeverisë.
Këtë zhvillim e ka komentuar edhe ministri i Bujqësisë Cem Ozdemir. Ai paralajmëroi se numri në rritje i mosmarrëveshjeve tregon se një “ndarje e rrezikshme” po shfaqet në vend.
Ozdemir, një anëtar i Partisë së Gjelbër, tha se ata që jetojnë në zonat rurale ndihen të neglizhuar dhe se të gjitha vendimet merren nga banorët e qytetit dhe ata që jetojnë në Berlin, të cilët nuk kanë lidhje me atë që duan gjermanët e zakonshëm.
Grevat e punonjësve të hekurudhave, të cilat filluan të mërkurën, kanë shkaktuar kaos në të gjithë vendin. Rrjeti i drejtuar nga Deutsche Bahn ka pezulluar të gjitha linjat e tij.
Claus Weselsky, kreu i sindikatës hekurudhore GDL, ka paralajmëruar se do të ketë veprime të mëtejshme pas përfundimit të grevës tre-ditore.
Për të kapërcyer valën e grevave, kancelari Scholz po kërkon mbështetjen e kolegëve të tij nga koalicioni: kreut të të Gjelbërve, Ricardo Lang dhe liderit të Demokratëve Federalë, Christian Duerr.
Por që kur filluan telashet, prania e grupeve të ekstremit të djathtë dhe neo-nazist në disa protesta bujqësore ka ngritur frikën se protestat mund të rrëmbehen nga ekstremistët anti-qeveritar.
Scholz u tha gjermanëve se “askush nuk duhet të ketë iluzione” për situatën në të cilën ndodhet vendi.
Që nga fillimi i mosmarrëveshjes, fermerët e zemëruar, të cilët kanë krijuar probleme të mëdha për qytetarët e Berlinit dhe qyteteve të tjera të mëdha, nuk tregojnë shenja të heqjes dorë. Mbi 1500 prej tyre pritet të shkaktojnë kaos në Frankfurt, përndryshe qendra financiare e vendit.
Ajo që protestuesit e quajnë “Java e Guximit”, përfshiu të 16 shtetet gjermane.
Britanikët janë mësuar me greva, por Gjermania nuk ka parë protesta masive si kjo që nga Lufta e Dytë Botërore.
Ekspertët politikë besojnë se partia e qendrës së majtë të Scholz do të mbajë pushtetin, por sa më gjatë që grevat të dëmtojnë vendin, aq më shumë dobësohet fuqia e tij. /tesheshi.com/
